Giluba, gibato angol

CEBU - Nalandig sa tambalanan ang usa ka 17-anyos nga lalaki human kini dunggaba ug tabangi og bato sa laing duha ka menor de edad niadtong Biyernes sa gabii didto sa sitio Kalmar, barangay Lawaan I, dakbayan sa Talisay.

Ang biktima giila sa mga polis nga si Demetrio Bacatan, taga Kalmar kinsa nakaangkon og samad dinunggaban sa walang bahin sa lawas ug agtang .

Samtang ang mga suspetsado kinsa nagpanuigon og 16 ug 17 ang usag-usa, temporaryong naditener karon sa Talisay City detention cell.

Ang duha nasikop dayon sa mga Field Training Police (FTP) nga sila si PO1 Janel Figura, PO1 Alico Roland, PO1 Eugenio Santillan ug PO1 Iris Salatan Baguio kinsa nag-roving diha sa maong lugar atol sa pagkahitabo.

Gawas nga gidunggab, gibato pa gyud sa mga suspek ang biktima hinungdan nga nabulit sa bun-og ang kalawasan sa naulahi.

Hinuon nasalbar kini kay nadali paghatod ngadto sa Vi cente Sotto Memorial Medical Center, sa Cebu City.

Si PO3 Arnold Damasco sa Talisay Police Station sa pakighinabi sa Banat News kagahapon sa buntag nagkanayon nga usa sa motibo sa maong insidente mao ang paregla.

Wala usab hinuon ibutyag sa kapolisan kung wala bay kalambigitan sa isyu sa fraternity ang maong hitabo kay wala masuta kun dili ba sakop sa maong grupo ang biktima ug ang mga suspetsado. – BANAT NEWS