'Pusher' gipan-an og laing 'pusher'

CEBU - Usa ka gitumbok nga notadong drug pusher sa Ginatilan nadakpan human pan-i sa kapulisan og mga sakop sa Philippine Drug Enforcement Agency (PDEA-7) ginamit ang laing drug pusher nga una nang nadakpan sa mga awtoridad niadtong Sabado sa alas 2:30 sa hapon.

Ang nasikop mao si Baltazar Intes Olores, alyas Sonny, molupyo sa Poblacion, Ginatilan.

Sila si SPO2 Arnold Omania ug PO1 Neil Fernandez inabagan sa PDEA-7 maoy nagpahigayun og busy bust operation nga niresulta sa pagkasikop sa suspek.

Matud ni SPO2 Omania dihang nahinabi sa Banat News nadakpan si Olores human madakpi sa PDEA-7 ang usa ka Joselito Rodriquez, molupyo sa barangay Bonbon lungsod sa Samboan nianang 1:30 sa hapon niadtong Sabado.

Subay sa impormasyon nga nahipos sa PDEA-7 si Rodriguez, maoy gitumbok usab nga mamaligyaay og shabu sa lungsod sa Samboan hinungdan nga gidakop kini pinaagi sa buy bust operation apan atol sa pagsukit-sukit kini mitug-ang gikan ang shabu kang Baltazar nga taga Ginatilan hinungdan nga daling nakig-alayon ang PDEA-7 ngadto sa kapulisan sa Ginatilan.

Gihimong paon sa awtoridad si Rodriquez ngadto kang Baltazar pinaagi sa pakig-transaksyon kaniya ug dihang nikubit na kini dali dayong gisikop.

Na-recover gikan sa posisyon niini ang 4 ka paketeng gituohang dunay sulod nga shabu. – BANAT NEWS