Curfew gipatuman sa Hipodromo

CEBU - Gipatuman na sugod kagabii diha sa barangay Hipodromo ning siyudad sa Sugbu ang Curfew Ordinance sa dakbayan.

Naalarma na ang mga opisyal sa barangay tungod sa nagkadaghang kabataan nga maglaroy-laroy diha sa Hipodromo panahon sa kagabhion.

Ubay-ubay sa mga menor de edad nga magsuruyan sa nahisgutang mga barangay giingong nagagikan sa kasikbit nga mga dapit.

Giklaro hinoon ni Barangay Kapitan Petronilo Fat nga ang ilang himoon mao lang ang pag-rescue sa magsuroy-suroy nga mga menor de edad paghagtok sa alas 10:00 sa kagabhion.

Nagkanayon ang kapitan nga kadtong ilang ma-rescue nga kabataan dalhon sa barangay hall sa Hipodromo ug ipatawag ang mga ginikanan niini.

Matud ni Fat nga kini ilang pahimangnoan sa tagsa-tagsa ka katungdanan isip mga ginikanan uban sa paghatag og pasidaan.

“Kadtong mga bata nga amo pa nga ma-rescue pag-usab diri sa barangay, amo na gyud nga ikiha ang mga ginikanan,” sumala sa kapitan

Samtang kadtong kabataan nga giabandonar na sa ilang mga ginikanan itugyan usab sa mga barangay officials ngadto sa hingtungdang ahensya.

Tambag ni Fat ngadto sa mga ginikanan nga atimanon ug monitoron ang kalihukan sa mga anak niini aron dili mamahimo unyang badlongon sa katilingban.

“Ato gyud nga hipuson ning atong mga bata inig abot sa alas 10:00 sa gabii, atong ilikay ang mga bata sa kadautan ilabi na sa pag-apil og gang kay kuyaw kaayo,” sumala ni Fat.

Nasayran sa Banat News nga ang Curfew Ordinance sa siyudad gipatuman na usab sa ubang kabarangayan sa dakbayan.

Wala lang hinoon matino kung nasustinihan ba sa nahisgutang mga barangay ang pagpatuman niini dihang nahingpit nga balaud ang Akta Republika 9344.

Ubos sa maong balaud dili na mahimong dakpon ug prisuhon bisan na pagposas sa nag-edad og kinse anyos paubos bisan kung kini makahimo og krimen. – BANAT NEWS