Basketbolista gipusil patay

CEBU - Usa ka basketball player ang namatay ug naangol sad ang kauban niini human kalit gipusil pipila ka minutos human modaog ang ilang koponan sa enter-barangay basketball league alang sa pista sa barangay Valencia siyudad sa Carcar kagahapong adlawa.

Nahitabo ang pagpamusil alas 10:30 niadtong Sabado sa gabii samtang sakay og motorsiklo sila si Joey Solon ug Juanito Moreno pulos sakop sa barangay Toyom team human nila gipukan ang barangay Cadlingan sa semis.

Gibutyag ni SPO3 Jonas Pagdanganan imbestigador sa Carcar City Police dihang nahinabi sa Banat News base usab sa inisyal niining pakisusi paingon na untang mamauli ang duha sakay sa giabangang habal-habal dihang pag-abot nila sa sitio Cabiawon, gibana-banang 500 metros gikan sa basketball court kalit nga may mipusil kanila.

Si Solon nga naigo diha sa bukobuko ug milapos ang bala diha sa iyang dughan natagak sa motor, sa pagtuong aksidente ra kining nahagbong mihunong ug gibalikan siya sa mga kauban aron pasakyon.

Apan nakugang nalang sila dihang nagkadugo na ang lawas ni Solon hinungdan nga ilaha kining giagak aron pasakyon ug dad-on sa tambalanan apan samtang ilaha kining gibuhat kalit usab nga nahagba si Moreno ug diha na nila mahibaw-ing samdan ang buko-buko niini.

Ang duha gidala sa Carcar District Hospital apan gideklarar nga dead on arrival si Solon samtang si Moreno gidali og dala sa tambalanan dinhi sa Sugbu tungod sa nag-ungot nga bala diha sa lawas niini.

Matud pang Pagdanganan naigo sa bukobuko si Solon ug milapos ang bala diha sa dughan ug adto milahos sa bukobuko ni Moreno.

Sa gihimong imbestigasyon nasutang init kaayo ang duwa sa duha ka koponan apan walay kagubot nga nahitabo sa mga players gawas nalang sa init kaayong abiba sa ilang mga dumadapig.

Midaog ang Barangay Toyom sa iskor nga 100 kontra sa 90 sa Barangay Cadlingan. Giingong sinaligan sa ilang team si Solon ug gituuhang may tawong nasuya sa duwa niini.

Kagahapong adlawa gipatawag ang tanang sakop sa Toyom team ug Cadlingan team aron i-paraffin test. Samtang nakuha ang usa ka basiyo sa kalibre 45 nga bala gibana-banang 100 metros gikan sa nahagbungan ni Solon. – BANAT NEWS