Rollback sa plite ipadali ni Jack

CEBU - Nanawagan karon si Konsehal Sylvan Jakosalem ngadto sa Land Transportation Franchising and Regulatory Board (LTFRB) nga dalion ang pag-compute niini alang sa rollback sa minimum nga plite.

Ang konsehal nga maoy chairman sa Committee on Transportation sa City Council nagtoo nga panahon na nga dunay ikapatuman nga bag-ong minimum nga plitehan.

Kini tungod usab sa nagpadayong pag-us-os sa presyo sa mga produktong petrolyo partikular na sa krudo ug gasolina.

Matud ni Jakosalem nga dili kinahanglang molanat pa og pipila ka buwan ang paghatag og minimum fare reduction tungod kay nagpadayon ang pag-us-os sa presyo sa lana.

“Bisan gani og walay petisyon, automatic unta nga motuon ang LTFRB kun angayan ba nga pasakaan o paos-usan ang plitehan, depende sa sitwasyon ba,” sumala sa konsehal.

Ang panawagan ni Jakosalem sa LTFRB iyang gipahaum sa pag-uyon sa pipila ka transport group nga angayan nang dunay ipatuman nga fare reduction.

Partikular na niini ang United Transport Koalisyon (1-UTAK) nga giingong nagtan-aw usab sa kaayuhan dili lang sa mga drayber lakip na ngadto sa mga sumasakay.

Nasayran nga gikunsulta na sa maong transport group ang tanang sakop niini sa tibuok kapupud-an ug niuyon nga dunay ipatuman nga pag-us-os sa minimum nga plite.

Kun pila ang ipatuman nga fare reduction miingon si Jakosalem nga kini anaa na sa LTFRB sa pagkwinta sa makiangayong kantidad.

Ang kadugay sa LTFRB pagpatuman og adjustment sa plite kun dunay pagsaka sa presyo sa lana maoy hinungdan nga nagdumili ang ubang transport group pagsanong sa pagpatuman og fare reduction niining higayona.

Partikular na niini ang Nagkahiusang   Drayber sa Sugbu (NADSU) nga gusto pa nga hatagan og higayon ang mga drayber sa pagpahimulos sa higayon.

Una nang gipadayag sa chairman sa NADSU nga si Ruben Rama nga sila mouyon lang sa fare reduction kun muabot na sa P30 ang presyo sa matag litro sa krudo. – BANAT NEWS