Serial Rapist Gipangita

CEBU - Tumang kabalaka ug kahadlok ang gibati karon sa mga residente ingon man mga opisyal sa bukiran nga bahin sa lungsod sa Tabuelan ang gidungog nga usa ka serial rapist nga manaka og kabalayan aron manglugos sa ginang sa panimalay nga mahibilin samtang wala ang bana.

Ang maong tawo susama sa gipangita kaniadto nga si Warlito Toledo alyas Waway nga gikahadlokan tungod sa report nga manulod kini og kabalayan aron manglugos sa mahibilin nga ginang sa panimalay.

Niadtong Sabado sa alas 11 sa buntag Midangop ug nagpa-blotter sa kapolisan ang kapitan gyud mismo sa barangay Canlujangon usa sa mga bukirang bahin sa lungsod sa Tabuelan nga si Kapitan Joel Escarlan human laing minyo nga babaye na usab unta ang gisaka ug buot biktimahon sa maong serial rapist.

Matud ni PO1 Charlie Valmoria sa Tabuelan Police Station sa dihang nahinabi sa Banat News subay sa blotter nga gibasehan niini gitug-an ni Kapitan Escarlan nga misumbong kaniya ang usa sa iyang mga konstituwente nga gitago lang una sa pangalan nga Inday-Inday nga gisaka sa suspek pinaagi sa pagguba sa pultahan niadtong Sabado sa alas 12 sa kaadlawon dala ang mahait nga hinagiban ug mideretso kini og patong kaniya samtang naghigda tupad sa iyang mga anak.

Gitug-an sa kapitan ngadto sa kapolisan nga maayo na lang gani kay wala pa makatulog ang biktima ug nakahimo kini sa pagsukol.

Tungod sa kahadlok sa suspek nga mailhan nagdali kini og dagan ug miambak sa bintana palayo sa lugar.

Hinuon wala gyud makaila ang biktima sa panagway sa suspek tungod kay ngitngit kaayo niadtong tungora ug lamparilya lang ang ilang suga apan bugtong niyang ma timan-an nga may pagkagamayon og lawas ang serial rapist.

Dugang pamahayag ni Kapitan Escarlan nga ang maong panghitabo maoy ikatulo nang higayon nga gihimo sa suspek nga pagpanaka niadtong mga panimalay sa ilang lugar panahon sa gabii.

Itumong kini sa maong serial rapist sa panahon nga mag-inusara lang ang asawa nga magpabilin sa panimalay ug wala ang bana.

Hinuon giklaro sa kapitan nga wala gyud magmalamposon ang rapist sa mao niining gihimo tungod kay mabantayan man usab kini sa buot niining biktimahon.

Ang mga opisyal sa barangay ingon man ang kapolisan padayon pa nga nanghipos og dugang kasayuran aron pagtumbok sa rapist nga gituohan usab nga molupyo ra sa maong lugar o sa kasikbit sa mga lungsod.

Dili pa lamang usab dugay nga napagya ang ngalan ni Alyas Waway tungod sa pagsumbong sa mga ginang sa panimalay nga nanaka kini sa kabalayan sa Danao ug Lilo-an aron manglugos sa mga ginang. Gani, ang report nagkanayon nga si alyas Waway mopatay usab sa babaye nga iyang lugoson.

Apan ang kapolisan mismo ang mibutyag nga walay rekord si alyas Waway sa kasong pagpatay.

Si Cebu Provincial Police director Carmelo Valmoria mismo kaniadto ang mihangyo sa mga tawo sa pagwagtang sa ilang kahadlok kang alyas Waway.

Gitataw ni Valmoria nga walay basehan ang kahadlok sa mga tawo tungod kay walay susamang panghitabo nga nagtumbok kang alyas Waway nga maoy suspek.

Ang kapolisan hinuon sa Tabuelan nanawagan sa mga residente sa pagbantay samtang wala pa mailhi ug masikop ang serial rapist sa ilang lugar. – BANAT NEWS