CEBU - Usa ka German ug usa ka Filipinang minyo ang gidakop sa kapolisan ug gibalhog sa karsel sa Pari-an police station human sila masakpi sa bana uban ang mga polis sa aktong naghilawas sulod sa usa ka gamay’ng hotel sa dalan Sepulveda sa barangay Zapatera kagahapon sa kaadlawon.
Si SPO4 Wilson Paglinawan sa Parian Police Station nga gikahinabi sa Banat News mibutyag kasamtangan nang gibalhog karon ang 46-anyos nga German kinsa diha mag-okupar og lawak sa nahisgutang hotel lakip na ang 29-anyos nga ginang nga taga barangay Apas nga maoy iyang kasalo sa kama.
Matud pa ni SPO4 Paglinawan nga ang bana sa maong babaye, nga usa ka engineer mao mismo ang miduol kanila ug nangayo’g tabang pagdakop sa iyang asawa human niya mahibaw-ing aduna kini karelasyong langyaw.
Si Sr. Insp. Bonifacio Graciano, hepe sa Pari-an police station mibutyag sa Banat News nga bag-uhay pang miabot ang bana gikan sa Japan niadtong bulan sa Hunyo.
Gikatahong nangabubho ang asawa sa bana ug nagpunay na ang ilang away ug niadtong bulan sa Agosto gikiha siya sa asawa ug gimandoan sa korte nga di makaduol sa ilang balay diin nagpabilin ang duha nila ka anak.
Dihang nibugnaw na ang sitwasyon pipila ka adlaw ang milabay makasuroy na ang bana diha sa ilang balay ug diha na niya mabantaying magbinuntagay kining mag-chat maong iyaha kining gibadlong.
Nagduda hinuon ang bana nga may karelasyong laing lalaki ang asawa hinungdan nga nanuhol kini og tawong maniid sa asawa ug diha na nila masutang tinuod ang iyang pagduda hinungdan nga niduol siya sa kapolisan.
Ang maong langyaw gikatahong miabot dinhi sa Pilipinas niadtong Oktobre 14, wala hinuon matino kung ang babaye bay maoy iyang tuyo dinhi apan hangtud karong adlawa natanggong pa sa bilanggoan ang langyaw diha sa Pari-an samtang ang asawa diha sa CCPO.
Gikuyugan nila ni SPO1 James Estrera, PO3 Francisco Ortiz ug PO1 Daniel Masecampo ang bana ug naabtan nila sa akto sulod sa hotel ang duha nga nagtagay sa lawasnong kalipay.
Giandam na sa kapulisan ang kaso batok sa babaye ingon man sa maong langyaw. – BANAT NEWS