FTDOA-Talisay ok i-recall si Soc

CEBU - Kahugpungan sa mga drayber sa traysikol sa dakbayan sa Talisay mipadayag og suporta sa kalihukan sa pagpa-recall kang Mayor Socrates Fernandez.

Ang presidente sa Federation of Tricycle Drivers Operators Association sa dakbayan sa Talisay, Boy Bihag sa pakighinabi niini sa Banat News kagahapon sa buntag nagkanayon nga ang ilang katuyoan mao ang pagpanagang daan samtang wala pa sila maigo sa giingong pagpangabuso sa anak sa mayor nga si Joavan.

Apan hinoon iyang gibutyag nga wala pay usa sa ilang mga kaubang drayber sa traysikol ang naabusohan ni Joavan.

Ang ilang pundok may gibana-banang 2,000-2,500 ka mga miyembro ug gilauman nga majority niini ang mopirma alang sa pagpa-recall kang Fernandez.

Ang pundok daghang gibatbat nga rason aron suportahan ang recall, kini pulos mga yangungo nilang wala atimana sa dakbayan ug sa konseho ilabi na mismo sa mayor.

Kahinumduman nga ang whistleblower ug ang negosyanteng si Crisologo Saavedra ang nagpasiugda sa nahisgutang recall kinsa ang unang mipirma niini ang kanhi kapitan sa barangay Jaclupan nga si Avelino Labajo.

Ang dakbayan sa Talisay ang adunay 94,156 nga mga botante sa 22 ka barangay niini ug adunay 525 ka presinto, ning mga botanteha nakakuha og 25,000 ka botos ang mayor niadtong eleksiyon sa tuig 2007.

Sa 94,156 ka mga botante 15,000-40,000 ka pirma niini ang gikinahanglan alang sa recall ug ipaubos pa kini sa pakisusi sa pagpiho nga ang mga mipirma pulos Talisaynon. – BANAT NEWS