CEBU - Tungod sa selos gipusil-patay sa 57-anyos nga lalaki ang 28-anyos niyang kapuyo ug pagkahuman nagpakamatay usab pinaagi sa pagpakuryente sa iyang kaugalingon sulod sa ilang gipuy-an sa sitio Sta. Ana Poblacion siyudad sa Toledo.
Ang duha patay nang nakit-an kagahapon sa alas 7:00 sa buntag giilang sila si Analie Merca, dalaga ug ang kapuyo niini nga si Beato Macapas, buwag na sa asawa ug nanag-iya og usa ka shop sa sakyanan sa maong lugar.
Matud ni SPO2 Carmelito Hornales sa Toledo City Police dihang nahinabi sa Banat News gipusil una ni Beato ang kapuyo sa ulo ug sa lawas nga maoy hinungdan sa kamatayon niini ug dihang patay na kini siya na usab ang nagpakamatay pinaagi sa pagputol sa linya sa kuryente ug ang positive gihigot sa iyang tiil samtang ang negative gihigot sa iyang walang kamot ug pagkahuman gipasiga niini ang switch.
Tungod sa boltahe sa kuryenteng milatay sa iyang lawas napaig ug nasunog ang patay'ng lawas ni Beato samtang nagbuy-od sa iyang tiilan ang patay'ng lawas sa iyang kapuyo.
Ang mga mirespondeng mga polis mao nay mipalong sa plangka.
Gibutyag sa mga silingan sa biktima sa kapulisan nga nianang mga alas 10:00 sa gabii nakadungog sila og duha ka sunod-sunod nga buto sa armas.
Hinungdan nga nanawag sila og polis apan dihang gisusi kini nila ni SPO2 Larry Pili mingaw na ang balay hinungdan mibiya nalang sila ug pagka-ugma na nila mahibaw-ing patay na ang duha.
Ang kapulisan naka-recover og .22 magnum ingon man suicide note gikan sa posisyon sa patay'ng lawas ni Beato nga nagpahibalo sa iyang duha ka mga anak sa una niining asawa nga dili pakasad-on ang iyang kapuyo sa ilang gidangatan.
Dugang pa sa maong suicide note ang kamandoan ngadto sa iyang mga anak nga ulian sa kwarta kadtong ilang mga kustomer nga nagpaayo nila og sakyanan ingon man nagpa-assemble nila og traysikol nga dili na niya matrabaho.
Matud ni SPO2 Hornales gituohan nila nga selos gyud ang motibo sa krimen human usab namatikdan nga kanunay nalang magsige og away ang duha sa nilabay'ng mga adlaw.
Dunay dili kumpirmadong report nga si Analie dunay sige nga gika-chat nga foreigner sa internet nga maoy gituohang giselosan sa kapuyo niini.
Ang mga patay'ng lawas sa duha kasamtangang gipahiluna sa Saint Frances Funeral Homes alang sa autopsy. – BANAT NEWS