Calub hadlok espesyalon sinagop ni Soc

CEBU - Warden sa Talisay City Jail sa barangay Maghaway dakbayan sa Talisay, Superintendent Johnson Calub nagkanayon nga dili nila isugal ang ilang propesyon aron hatagan og special treatment ang anak sa mayor sa siyudad nga si Joavan Fernandez nga mao na unya’y hinungdan nga malagpot sila sa ilang serbisyo diin aduna usab sila’y mga pamilyang gisuportahan.

Apan matud niini nga dili malikayan nga ang publiko matahap nga gihatagan og special treatment si Joavan tungod kay anak kini sa mayor.

“In our case as jail officers, if we are doing such act we could violate the policy of the BJMP, so kung kami dili pod na namo mabuhat ug kung mapamatud-an nga tinuod ma-complain mi sa Ombudsman may posibilidad nga masuspenso mi, or even worse ma-dismiss mi sa among trabaho we have also a family to support,” ni Calub pa.

Si Calub nagkanayon nga igo lang nilang ipatuman ang ilang trabaho apan dako ang ilang respeto ni Mayor Socrates Fernandez.

Sa adlaw nga Martes, Huwebes, Sabado ug Domingo gikan sa alas 9 sa buntag hangtod sa alas 3 sa hapon mahimong moduaw si Mayor Fernandez sa iyang sinagop.

Kagahapon sa buntag si Mayor Fernandez ang nasugatan pa sa mga tigbalita nga paingon nang migawas gikan sa City Jail.

Kagahapon adunay gipahigayong Santos nga Misa diha sulod sa City Jail ug matud ni Calub nga himuon kini matag Huwebes.

Sila si Padre Roman Cañon sa Mohon Parish ug Padre Juan Buban, chaplain sa Bureau of Jail Management and Penology (BJMP) ang selembrante sa misa kagahapon.

Naabtan sa mga tigbalita si Joavan kagahapon sa buntag nga gipa-ubos sa counseling sa nahisgutang duha ka pari.

Si Joavan miatubang pa ug nakig-istorya sa makadiyot sa mga sakop sa media kinsa misulod kagahapon sa city jail.

Si Joavan gitipon sa lima ka giingong kauban niya sa pagpangulata sa mag-agaw’ng Osbert ug Winston Abellana diha sa usa ka cottage diin 50 silang tanan ka inmates sulod sa maong cottage.

Sa laing bahin, gihimakak ni Calub ang taho nga si Mayor Fernandez motungha lang diha sa City Jail bisan og dili adlaw sa tingbisita ug ang giingong ihuwad ni Joavan ang iyang pagkaon nga rasyon kun dili siya makauyon niini ug magpadala og pagkaon gikan sa restaurant sa gawas.

Matud ni Calub nga kun gibuhat kini ni Joavan siya ang unang makahibawo ug masilotan kini ubos sa ilang polisiya sa City Jail.

Ang matag piniriso   adunay P50 nga food allowance sa usa ka adlaw apan gibutyag ni Calub nga ang rasyon nga pagkaon sa mga piniriso   sama sa pagkaon sa gawas apan gitugot nila nga ang mga mobisita   magdala og mga pagkaon.

Ang Talisay City Jail adunay 328 ka inmates kinsa 42 niini mga babaye ug 60 porsiyento niini ang dunay kaso kalabutan sa ginadiling drugas.

Si Calub midugang nga walay nahitabong kasamok sa mga piniriso bisan pa og mga sakop sa fraternity ang iyang giipon sa usa ka cottage tungod kay gipaimplementar niya ang ilang golden rule nga mao ang “mutual respect”. – BANAT NEWS