Mabdos Patay Sa Pinusilay Sa Naga

CEBU - Bisan dugay nang natapos ang synchronized election wala pa gihapon matapos ang panagbangi sa politika diha sa barangay Cabungahan dakbayan sa Naga human usa ka mabdos ang giingong nakalas dihang nagpinusilay ang duha ka partido sa mga nag-atbang nga mga barangay kapitan niadtong milabay'ng Sabado sa hapon.

Ang panagbangi nakaapekto usab sa klase sa elementarya sa maong barangay gumikan sa kahadlok sa subling kagubot sa duha ka partido ug mga supporters ni kanhi Cabungahan barangay captain Epifanio Entica ug incumbent captain Federico Cabesares.

Ang duha ka managribal nga mga kapitan gikatahong mga supporters sa politika sa kasamtangang mayor sa dakbayan sa Naga nga si Mayor Valdemar Chiong ug kang kanhi mayor Paul Ong, si Entica giingong sakop sa kampo sa mga Chiong samtang si Cabesares kang Ong kaniadto apan di pa dugay si Cabesares giingong mitapon na sa administrasyon.

Giila ni PO3 Edwin Engayo sa Naga Police Station ang nakalas nga mabdos mao si Lani Lapes, residente sa maong dapit apan wala maestablisar sa kapolisan kung pila ka buwang mabdos ug usa lang sa gatusan ka mga nanan-aw sa usa ka liga sa basketball nga gi-organized ni Kapitan Cabesares.

Samtang ang gitumbok nga mga suspek giilang sila si Ronald Paunil, 27; Bernardine Gentica, 27; ug usa ka giilang si Edgar Bacus nga giingong pulos mga supporter sa naparot nga kapitan nga si Entica ug padayon pang gipangita sa kapolisan. Ang maong basketball tournament kabahin sa pagpangandam sa selebrasyon sa kapistahan sa barangay karong Oktubre 25 ning buwana.

Gikataho nga mga alas 5 sa hapon niadtong Sabado ug tunga-tunga na sa duwa sa duha ka koponan gikatahong nangabot ang mga suspek nga may mga gibitbit nga mga tag-as nga kalibre sa armas ug gipangrakrakan ang mga nanan-aw.

Usa sa mga naigo mao si Lapes kinsa gidali og dala sa Minglanilla District Hospital apan wala na kini makaabot nga buhi sa maong tambalanan.

Sila si Kagawad Quirico Lapes ug mga tanod nga sila si Wilfredo Cabesares ug Jan Mangubat maoy mitumbok sa mga suspek.

Si Naga City Police Office chief Renato Malazarte nagkanayon nga padayon pa ang hot pursuit operation sa mga suspek apan hangtud ning pagsulat sa balita wala pa makit-i ang mga responsable.

Wala gyud pa hinuon maestablisar sa kapolisan kung may koneksyon ba gyud sa panagbangi sa politika tali sa duha ka kapitan ang motibo sa krimen sanglit padayon pang nagtigum og mga pamahayag ug impormasyon ang mga imbestigador.

Niadtong adlaw'ng Lunes gikatahong nanggawas ang mga isig ka supporters sa duha ka kapitan nga nagdala og mga armas ug diriyot nga magpinusilay hinungdan nga wala na manulod sa klase ang mga tinun-an. Ang maong tunghaan nahimutang tunga-tunga sa duha ka bukid nga parehong nahimutangan sa duha ka kampo.

Si Mayor Chiong sa pakighinabi sa Banat News mibutyag nga niadtong milabay'ng buwan iyang gihusay ang duha ka partido kabahin sa ilang politikanhong panagribal.

Karong adlawa duawon sa mayor ang namatay aron matan-aw kung unsay matabang sa pamilyang Lapes sa gobiyerno ug pakigkitaan usab ang Parents Teachers Community Association tungod sa pagkaputol sa klase. - Uban sa report ni Guam Logroño (BANAT NEWS)