Sapatero giluba sa ugangan

CEBU - Tungod sa ilimnong makahubog giunay og dunggab sa usa ka ugangan ang umagad niyang mananahi og sapatos o sapatero didto sa Sitio Magsipit barangay Liboron siyudad sa Carcar niadtong Martes sa alas 10:00 sa gabii.

Ang biktima mao si Adelaido Lapeña Jr., 29 , minyo, mananahi’g sapatos nga taga Magsipit, samtang ang   suspek mao ra usab ang iyang ugangan nga si Ricardo Fernandez, 50 , buwag na sa iyang asawa.

Si PO3 Reynaldo Fuentes sa Carcar City Police Station mibutyag sa Banat News nga ang biktima ug ang suspetsado nag-ihaw og iro nga gihimo nilang sumsoman samtang nag-inom sa balay sa suspek.

Apan dihang nangalasbag na mitumaw ang lalis sa duha kalabot sa suliran sa pamilya.

Ang suspek nga nahutdan sa katarungan wala na kapailob ug gikuha niini ang kutsilyo sa kusina ug milipot sa luyo sa biktima ug gidunggab ang walang bahin sa buko-buko niini.

Gumikan niini mikabad og dagan ang biktima nga nagsirit ang dugo sa iyang lawas paingon ngadto sa Carcar District Hospital.