Oaminal mipaandam sa LGU

CEBU - Si Undersecretary Paul Clarence Oaminal sa Dangerous Drugs Board (DDB) miawhag sa mga Local Government Units (LGU) sa paghulma nang daan sa mga programa alang sa umaabot nga Drugs-Abuse Prevention Month karong Nobiyembre 9-15 ning tuiga.

Gidasig ni Oaminal nga mosalmot ang tanang hingtungdan uban ang nagkadaiyang sektor dinhi sa Central Visayas agig pagsuporta sa gobyerno sa pagpakigbatok niini sa illegal nga drugas.

Matud pa sa luyoluyong kalihim sa DDB nga angayan lang nga ang mga local nga opisyal dinhi sa Central Visayas ug kadtong atua sa mga hilit nga lugar nga moduyog sa DDB sa pagsaulog sa Drugs-Abuse Prevention Month karong sunod bulan uban sa giandam nga salmot nga programa sa pagsanta nila sa ilegal nga drugas sa ilang tagsa-tagsa ka dapit.

Miingon si Oaminal nga dili maayong pasagdan lang ang mga nag-unang dakbayan ug lungsod dinhi sa nasud nga mao ray makigbatok sa ilegal nga drugas sanglit ang mga durugista anaa sa tanang lugar.

Nanghinaot siya nga ang mga local nga opisyal sa kabarangayan sa Central Visayas mohan-ay na sa ilang mga kalihokan sama sa seminar ug symposium diha sa ilang mga lugar aron sa pag-edukar sa katawhan ug ilabi na ang kabatan-onan.

Nanghinaot usab siya nga ang mga opisyal sa Parents Teachers Community Association (PTCA) ug Non Government Organizations (NGO) moduyog sa mga opisyal sa kabarangayan aron nga ang mga tinun-an ug ang ilang mga anak malikay usab sa drugas.

Midugang si Oaminal nga bisan kun layo pa ang maong kalihokan angayan nang pangandaman daan sa tanan sanglit ang pagsumpo sa drugas dili mahimo sa usa lamang ka pamilok kundili nagkinahanglan kini og taas nga panahon. – BANAT NEWS