Anchorman may "death threat"

CEBU - Hulga sa kinabuhi maoy rason ni Cesar Montenegro, anchorman sa Radio Natin FM sa lungsod sa Balamban, nganong wala na siya mopatim-aw sa iyang programa sa radio.

Kini maoy gibutyag ni Montenegro atol sa iyang pakighinabi sa Banat News human mabaniog nga mikagiw na siya ug mibahag ang ikog human malambigit sa paghikog sa 18 anyos nga katabang niadtong Sabado sa buntag sulod sa usa ka lodging house sa Balamban.

Matud pa ni Montenegro nga milikay lang una siya sa Balamban ug nia dinhi sa dakbayan sa Sugbu siya mag-estar karon gumikan sa mga hulga nga iyang nadawat

Miingon si Montenegro nga ang iyang igsoon ug mga higala maoy nakadawat sa mga pahibawo kalabot sa panimawos nga himoon sa mga kabanay ni Anita nga matud pa honusan gyud siya (Montenegro) sa kinabuhi.

Apan giangkon niya nga wala siya molayas og laing lugar kundi nia ra siya sa dakbayan sa Sugbo ug andam moatubang sa unsa mang imbistigasyon kun gikinahanhglan.

“Dili na tinood nga nisibat ko naa ra ko diri sa dakbayan sa Sugbu uban sa akong pamilya ug pito ka mga anak aron usab mi molikay sa peligro kay kuhaon ra gyud ko nila,” nagkanayon si Montenegro.

Matud pa niya nga wala siya mokompiyansa ilabi na nga nasayran niya nga ang amahan sa nagpakamatay usa ka kanhi kumander sa New Peoples Army (NPA).

“Bisan kadtong nagpakamatay mitug-an man gyud sab to nga ang iyang papa kumander gyud sa NPA sa una…hinungdan nga nabalaka gyud ko ug gani mag-phone patch nalang ko una sa akong program,” miingon si Montenegro.

Apan iyang giklaro nga ang iyang close coordination sa kapulisan nagpadayon tungod kay adunay numero niya ang kapulisan ingon man nasayod sila sa iyang gipuy-an dinhi sa dakbayan.

Samtang iyang ikalipay kun ang National Bureau of Investigation (NBI-7) moapil sa imbestigasyon sa maong kaso kini aron usab malimpiyo siya sa pagduda sa kamatayon sa maong dalaga.

Si Anita napalgang patay sulod sa usa ka lodging house nga naghikot sa liston sa sapatos sa iyang liog niadtong Sabado sa buntag.

Samtang ang mga saksi mitug-an sa kapulisan nga si Cesar maoy kuyog sa maong dalaga nga mi-check sa maong lodging house nianang Biyernes sa gabii. – BANAT NEWS