Desk officer pa-eskuylahon - Pe

CEBU - Gitinguha usab karon ni Cebu City Councilor Augustus Pe Jr., nga paeskwelahon o pakuhaon usab og refresher course ang tanang desk officer sa nagkadaiyang police station ug police unit sa Cebu City Police Office (CCPO).

Kini human mogradwar ang 52 ka mga police investigator sa CCPO niadtong miaging semana nga mikuha og investigative writing.

Gawas sa mga imbistigador namatikdan usab ni Konsehal Pe ang mga desk officer nga dili maayong mohan-ay sa facts diha sa police blotter.

Kini ang hinungdan nga gisugyot sa konsehal ngadto kang CCPO Director Senior Superintendent Patrocinio Comendador ang pagpakuha og refresher course sa mga desk officer.

“Para gyud nga matarong ang input kinahanglan nga maayo usab nga pagkasuwat ang fact diha sa blotter, ato ni silang paeskwelahon,” sumala ni Pe.

Gipadayag sa konsehal nga ang kagamhanan sa dakbayan andam gihapong mogasto alang sa pagtungha unya sa nahisgutang mga police officer.

Nagkanayon hinuon si Pe nga unya pa sa sunod tuig-tingtungha mapaeskwela ang mga desk officer sa kapolisan sa siyudad.

Kini tungod kay ipalabang pa sa konsehal ang resolusyon ngadto sa City Council nga maggahin og pundo alang sa maong katuyoan.

Sama sa pagpatungha sa mga police investigator, gibana-banang mogasto ang dakbayan og dul-an sa P200 mil pagpa-eskwela sa mga desk officer.

Matud ni Pe nga ang City government andam kanunay pagtabang sa kapulisan aron molambo pa ang kahibawo ug pagpangalagad niini.

Ang konsehal nga maoy chairman sa Committee on Public Order and Safety sa City Council miingon nga siya maninguha nga mapatungha ang mga desk officer.

Gawas niini gipasalig usab ni Pe nga dugang suporta ang ihatag sa dakbayan ngadto sa kapulisan alang sa epektibo nilang pagserbisyo. (BANAT NEWS)