Usa ka 36-anyos nga giingong ex-convict ug karon nanginabuhi nalang pinaagi sa pagmaneho og traysikad ang gipusil-patay sa wala mailhing lalaki duol sa ilang balay diha sa dalan Miramar sa
barangay Poblacion, dakbayan sa Talisay kagahapon sa buntag.
Base sa imbestigasyon sa kapolisan sa maong dakbayan si Ruben Sanchez, padulong na pauli gikan mamasahero pasado alas 8 sa buntag kagahapon dihang usa ka lalaking nagtaptap sa nawong ang mibabag kaniya.
Ang suspek gikatahong kalit nga mibunot og wala matinong calibre sa armas ug gipusil ang biktima duha ka higayon ug naigo diha sa ulo ug dughan nga nakaingon sa hinanali niining kamatayon.
Sumala pa sa mga nakasaksi ang suspek gawas nga nagtaptap sa nawong nagsuot usab kini og itom nga jacket, puting t-shirt ug maong nga pantalon.
Wala pa usab matino sa kapolisan kung unsang matang sa armas ang gigamit sa mamumuno sanglit walay bisan usa ka basiyo sa bala ang nakit-an diha sa crime scene apan gituuhang rebolber kini. Usa sa mga nangangkong nakakita sa hitabo apan nagdumili sa pagpahingalan nagkanayon nakadungog ra siya og duha ka buto gikan sa gawas samtang siya diha sa ilang balay , ug dihang iyang gilili sa gawas nakit-an niya si Sanchez nga nahagba na ug wala na maglihok.
Sumala pa sa kapolisan niadto pang 2003 nakagawas gikan sa New Bilibid Prison sa Muntinlupa tungod sa kasong murder si Sanchez human mabilanggo sulod sa tulo ka tuig.
Niadtong milabay'ng bulan sa Mayo gikatahong nadunggaban usab ang biktima sa tawong iyang gikabangi kaniadto kinsa atoa na karon sa Talisay City Jail.