Hostage-taker gigamitan tear gas

Usa ka 33-anyos nga lalaking gituuhang may deperensya sa pangisip ang nadakpan human gamiti og teargas atol sa usa ug tunga sa oras nga negosasyon dihang gikatahong misuway og hostage sa duha ka mga batang silingan diha sa barangay Tapilon, lungsod sa Daanbantayan kagahapon sa buntag.

Ang kapolisan pinanguluhan ni Insp. Bonifacio Arriesgado migamit na og pwersa pinaagi sa paglabay og tear gas human nagmagahi pagtahan si Edwin Rosell, 33.

Sumala pa sa kapolisan ang suspek nasuko ug nanghagis sa mga silingan samtang nagpangita sa iyang P800 nga kwarta ug nanulod sa mga balay samtang nagbitbit og duha ka kutsilyo.

Usa ka tawag sa telepono alas 8:45 sa buntag kagahapon ang nadawat sa kapolisan labot sa pagpang-hostage sa nahisgutang lugar diin duha ka mga bata ang giingong gihulgang pasipad-an sa suspek.

Si Insp. Arriesgado uban nilang SPO4 Melchor Batucan, SPO2 Herminio Marinduque, PO1 Henry Compuesto ug PO1 Keith Castro daling miadto sa dapit ug nakig-negotiate.

Gikatahong misulod kini sa usa sa mga panimalay diin mahimutang ang duha ka magsuong 5- anyos ug 7-anyos nga mao ray nabilin sa panimalay, apan gumikan sa kabanha na sa palibot nakabantay ang mga bata sa kagubot ug nakadungog sa sangpit sa mga silingan nga sila pagawason hinungdan nga nangikyas sila sa gamay'ng lungag sa luyo sa balay.

Dihang nangabot ang mga polis diha na si Rosell atubangan sa ilang balay ug daw mipakitang mosukol ug mihulga sa mga polis   kung siya pugson.

Apan wala nay nahimo si Rosell dihang gialirungan sa mga tanod ug mga polis ug kalit nga gipasiritan og tear gas hinungdan nga dali kining nalayog ug nadisarmahan sa mga awtoridad.

 “Wala man ko nang-hostage sir, sa akin lang, ibalik lang nila ang pera ko,” nagkanayun si Rosell nga gikahinabi sa Banat News sulod sa detention cell.

Wala hinoon nitug-an si Rosell kun kinsa ang nagkuha sa iyang kwarta balor og P800.

“Lord, balik nyo na ang pera ko,” sumala pa niya samtang nag-atubang sa imahen ni Hesukristo sulod sa bilanggoan.