Kritikal ang kahimtang sa usa ka batan-ong lalaki dihang giatngan kini sa dalan ug gilabay og bato sa ulo ug pagkahuman gidunggab sa abaga samtang paingon na unta kining mopauli gikan nga nitambong og disco sa sitio Tunga barangay Matab-ang siyudad sa Toledo niadtong Domingo sa alas 2:00 sa kaadlawon.
Ang biktima mao si Decem de Gracia, 20, molupyo sa sitio Marcela, Matab-ang samtang ang suspek mao ang usa ka Loyge Gallosa, molupyo sa sitio Tubod, Matab-ang.
Matud ni SPO2 Larry Pili sa Toledo City Police dihang nahinabi sa Banat News gikan sa usa ka disco sa maong lugar ang biktima kuyog ang iyang ig-agaw dihang paghiabot nila sa maong lugar nipadaplin sa dalan ang biktima aron sa pagpangihi.
Apan wala kini makatiwas sa pagpangihi dihang nipaka ang ulo niini human gihapak sa suspek, wala pa matagbaw gihansakan sa dalang kutsilyo sa ubos nga bahin sa abaga si de Gracia.
Ang suspek daling midagan pahilayo sa lugar samtang gidala ang biktima sa Toledo City Hospital, gituuhang personal nga motibo ang hinungdan sa hitabo.