7 sikop sa rambol sa diskohan

CEBU – Pito ka mga lalaki apil na ang duha ka minor de edad natanggong sa Fuente Police Station human magkarambola kagahapon sa alas 4 sa kaadlawon sulod sa 2nd floor Club Pump 2 sa Mango Avenue ning dakbayan.

Si PO1 Rosalyne Kilakila nga gikahinabi sa Banat News miila sa mga dinakpan nga sila si Darwin Cruz, 30, minyo, taga Poblacion Talisay City, ug John Paul Daan taga Tangke, Talisay City.

Samtang ang gika-engkwentro sa duha diha sa maong diskohan mao sila si James Yaban, 19 ulitawo, Edrian, 17, John,   17, pulos minor edad nga taga Labangon ug Metanie Ebrado, 23, taga Phase 1 Villa Leyson Bacayan, Raymund Mangubat, 23, taga Camputhaw.

Ang pito gireklamo ni Niño Villarubia, supervisor sa maong diskohan dihang gikatahong nagkaaway ug si Cruz matud pa maoy milabay og botelya ngadto sa pikas grupo.

Nunot niini nahitabo ang kaguliyang gumikan kay mibawos usab sa paglabay og botelya ang grupo nila ni Yaban hinungdan nga upat usab ka mga laing batan-on nalandig sa tambalanan human nangasamad sa botelya.

Ang pito nadakpan sa kapolisan sa Fuente human gika-alarma ug gikatakdang pasakaan og kaso karong adlawa nga maliscious mischief gumikan sa ilang gihimong kadaot sa diskohan.

Hinuon ang kapolisan wala pa makakuhag impormasyon kun unsang matang sa grupo nasakop ang maong mga batan-on apan nagduda sila nga aduna gyud kini mga gang. Si PO1 Kilakila mibutyag sa Banat News nga ang mga representante sa maong club nideklarar nga naguba ang ilang swing class door nga mokabat sa P40 mil   nga mga botelya sa beer ug uban pang ilimnom, P15 mil nga wala mabayre sa mga suspetsado, ug P5 mil   nga alakanse. – BANAT NEWS