CEBU – Nayagyag ang tinai ug patay nang nadangat sa tambalanan ang usa ka 27 anyos nga lalaki human kini gitigbas sa iyang kaugalingong silingan nga nag-inom niadtong tungora ug nasuko nga mibalibad pag-inom sa gihatag nga tagay didto sa barangay Maño, lungsod sa San Remegio, Cebu niadtong Sabado sa alas 8:10 sa gabii.
Ang biktima nga nababha ang tuong kilid sa iyang tiyan agi sa tinigbasan ug nayagyag ang tinai mao si Micheal Bendrin, 27, minyo samtang ang suspek mao ra ang iyang silingan nga si Rey Bolivar, 34, minyo ug pulos molupyo sa nahisgutang lugar.
Matud ni PO2 Herman Bulawit sa San Remegio Police Station sa dihang nahinabi sa Banat News subay sa blotter nga gibasihan niini subay sa alegasyon sa asawa sa biktima nga gikan nga nanaka og mga bunga sa mangga ang biktima sa dihang mipauli sa ilang balay.
Apan tungod kay diha man sa gawas ang suspek ug mga kauban niini nga nag-inom gitagayan ang biktima pag-agi niini sa duol apan tungod kay gikan pa sa trabaho mibalibad kini kay wala pay kaon.
Matud pa nasuko ang suspek sa pagbalibad sa biktima ug mipauli kini sa iyang balay ug mikuha og sundang ug sa pagbalik niini gitigbas deretso ang biktima sa walay daghang pangutana.
Matud ni PO2 Bulawit maayong pagkayagyag sa tinai sa biktima human maigo kini sa tinigbasan sa tuong bahin sa kilid sa iyang tiyan ug sa dihang nakakita ang suspek nga maayong pagkayagyag sa tinai niini nagdali kini og sibat pahilayo dala ang sundang niini.
Ang mga silingan ug kabanay sa biktima maoy nagtinabangay pagdala sa biktima didto sa Don Severo Verallo District Hospital sa siyudad sa Bogo apan gideklarar kining dead on arrival (DOA).
Apan paglabay sa pipila ka oras, ang suspek boluntaryong mitahan sa iyang kaugalingon sa hepe sa tanod sa maong barangay nga si Terisito Ejoranco ug mao na kini mitugyan ngadto sa kapolisan.
Apan ang suspek sa iyang bahin nangatarungan usab nga igo lang niyang gitagayan ang biktima sa ilang gi-inom pag-abot niini apan nasuko kini ug gisukmag siya ug gibaharan pa nga buk-an sa iyang ulo hinungdan nga mipauli siya ug mikuha og sundang ug pagbalik gitigbas ang biktima.
Ang si Bolivar nagtingkagol na karon sa detention cell gitakdang pasakaan og kaso sa piskaliya karong buntag. – BANAT NEWS