Mitulis sa estudyante mitahan

CEBU – Misurender na ang suspek nga mitulis sa usa ka estudyanteng babaye didto sa barangay Jaclupan, dakbayan sa Talisay niadtong miaging gabii.

Si Senior Inspector Jovito Canlapan, officer in charge sa Talisay City Police Station nga nahinabi sa Banat News kagahapon sa buntag mibutyag nga si Eugenio Gabunalo, 19, nga taga Jaclupan, mitahan ngadto kang kapitan Joel Obiso sa Jaclupan niadtong Biyernes sa gabii.

Si Gabunalo miangkon nga ang iyang pagtahan maoy paglimpiyo sa iyang ngalan human siya pasanginli nga maoy mitulis ug miluba kang Joy Cerna Eleguin, 18, taga Jaclupan ra usab.

Matud ni Canlapan nga si Gabunalo ilang gidala ngadto sa Visayas Community Hospital diin tambali si Eleguin ug didto positibo siyang (Gabunalo) giila sa maong biktima nga maoy mitulis kaniya ug midunggab.

Si Gabunalo kinsa natingkagsol karon sa Talisay City detention cell gikatahong ubos sa ginadiling drugas dihang gitulis niini ang biktima.

Si Canlapan nagkanayon nga aduna silay nadawat nga mga impormasyon nga si Gabunalo nalambigit usab sa ubang kaso sa pagpanulis diha sa dakbayan apan iya pa kining gipasusi.

Kahinumdoman nga si Eleguin naglakaw paingon na nga mopauli dihang usa ka wala mailhing tawo nga may kutsilyo ang kalit lang mibabag sa dalan ug miti-on og kutsilyo sa iyang liog uban sa pahibawo nga tulis.

Misukol ang biktima hinungdan nga gidunggab kini sa suspek ug aron masiguro gyud nga mamatay, gihapak pa og bato ang ulo sa biktima.

Apan may suwerte pa si Eleguin kay bisan kun nakaangkon kini og 15 ka samad dinunggaban sa nagkadaiyang bahin sa iyang lawas wala kini kabsi sa kinabuhi.

Ang suspek nga nagtuo nga patay na ang biktima, daling mibiya sa lugar diin niya dunggaba ug pusposi og bato ang biktima dala ang cellular phone ug kwarta sa naulahi. – BANAT NEWS