Soc gihagit sa mga reporter

CEBU – Gihagit sa mga sakop sa Talisay City Reporters Organization (TCRO) si Mayor Socrates Fernandez sa pagbutyag sa ngalan sa iyang giingong mga sakop sa media nga sakop usab sa usa ka “PR firm” kinsa gituohan niyang buot kunong modaot kaniya.

Ang maong lakang gihimo sa maong mga reporter dihang si Gary Cabotaje sa Sun Star Daily ug si Mayor Fernandez, nagkasinukliay og mga pulong sa milabay’ng adlaw dihang ang nahauna gipasanginlan sa mayor nga miyembro sa usa ka PR firm.

Ang maong pasangil gihimo sa mayor dihang gisukit siya ni Cabotaje unsa ka tinuod nga mibayad siya (mayor) og P10 mil sa utang ni Mercidita Abellana ngadto sa agawon niini.

Si Abellana giingong usa kini ka inahan sa gikaatraso ni Joavan , ang anak ni mayor Fernadez kinsa nagtingkagol na karon sa prisohan.

Matud ni Cabotaje nga imbis motubag ang mayor og tinarong, naunsa bang gisumbalik naman hinuon siyag pangutana kun apil ba siya sa PR firm.

Niadtong Biyernes ang mga sakop sa media nagpanon ngadto sa buhatan sa mayor aron sa pagpakisayod kinsay taga media nga sakop niining iyang giingong PR firm.

Apan walay gikatumbok nga ngalan ang mayor ug hinuon gihatagan niya og lektura ang mga sakop sa media.

Miingon ang mayor nga ang kahulogan sa pulong “news” para kaniya, bag-o, nga alang kaniya kun mosuwat og balita ang taga media kinahanglang pulos bag-ong balita, ug dili na niya pahisgotan ang daan nga mga hitabo nga koneksyon sa balitang bag-o.

Hinuon gisabot nalang sa mga tigbalita tungod kay ang mayor malagmit wala kaayo masayod kun unsay tinuod nga paagi sa pagsuwat og balita.

Ang presidente sa TCRO nga si Vince Monterde nagpatawag og tigom karong Lunes aron tukion ang maong problema ug sa paghimo og plano sa sunod nilang lakang. – BANAT NEWS