Katabang naghikog kay nagselos

CEBU – Wala nay kinabuhi nga nagluhod nga may higot nga liston sa sapatos ang liog sa 17-anyos nga dalagitang katabang sulod sa usa ka lodging house nga nahimutang sa barangay Baliwagan, lungsod sa Balamban.

Ang naghikog tungod sa “love triangle” mao si Nita (dili tinuod nga ngalan) taga Sitio Awom, barangay Duangan, sa Balamban ug nag-alagad dinhi sa Sugbu isip katabang, apan mibalik sa Balamban aron mag-hire og daghang katabang nga patrabahuon dinhi sa dakbayan.

Si PO3 Celso Diaz sa Balamban Police Station nga nahinabi sa Banat News miingon nga ang tag-iya sa maong lodging house nga si Severino Adolfo Ngujo maoy mitaho mga alas 10 sa buntag kagahapon nga nakit-an niini nga wala nay kinabuhi ang biktima.

Sumala pa niini nga sa dihang gisuhid sa ilang mga kaubanan ang maong lugar naabtan pa niini si Nita nga nagluhod nga may higot nga liston ang liog nga ang pikas tumoy gihigot ngadto sa “balluster.”

Matud pa ni PO3 Diaz nga mga alas 11 pasado sa buntag ang patay’ng lawas ni Nita gipaubos sa autopsy ni Dra. Aurora Bendebel, medico legal officer sa Balamban ug nasuta nga ang namatyan sa biktima mao ang “asphyxia.”

Nunot niini, sa gipahigayong follow-up operation nila ni SPO4 Marcial Dacua Montebon ug PO2 Hanibal Larida, ilang giimbitar sa presinto ang usa ka anchorman sa Radyo Natin nga gipanag-iya sa Manila Broadcasting Co. nga nagbase sa Balamban nga nailhan sa ngalan nga Cesar Señeron Montenegro, 40, minyo ug taga barangay Pondol sa nahisgutang lungsod.

Si Montenegro positibo kining giila sa mga saksi nga maoy kauban ni Nita sa dihang mi-check-in mga alas 8 pasado sa miaging gabii.

Si PO2 Rolando Navarro, imbestigador sa Balamban Police Station nga gikahinabi sa Banat News nagkanayon nga wala pa sila makakita og foul-play sa kamatayon sa maong babaye.

Apan gisusi karon sa kapolisan ang anggulo nga “love triangle.”

Hinuon, wala magtuo ang medico-legal officer nga gilugos si Nita una pa kini nagpakamatay. Si Nita, sumala pa ni SPO2 Navarro, gidugo sa dihang gi-autopsy ni Dra. Bendebel.

Si SPO2 Navarro mipaklaro sa Banat News nga si Montenegro miasoy kaniya nga nagselos ang 17-anyos tungod kay adunay mga tigpaminaw sa radio nga mag-text niya.

Si Montenegro mibadlong sa 17-anyos tungod kay nagpatuo kini nga asawa kaniya ug nangaway sa mga texter nga mga tigpaminaw sa radyo, sumala pa ni SPO2 Navarro.

Gisusi sa kapolisan ang cellphone sa 17-anyos nga   aduna kini 30 ka mga text messages nga nakig-away.

Si Montenegro nga nahinabi sa Banat News miangkon nga nagkakita sila sa 17-anyos sa gi-estaran niini nga lodging house mga alas 8 sa miaging gabii human siya gipaadto niini. Apan giklaro niya nga mga 15 minutos lamang siya didto tungod kay mibalik siya sa radio station.

Iyang giangkon nga pagka-alas 10 sa gabii mibalik siya uban sa iyang 14-anyos nga anak lalaki human siya gi-text ug gitawgan nga pabalikon kay magpapalit kini og paracetamol tungod kay naglabad ang iyang ulo gumikan kay gidugo.

Giangkon niini nga ang nagpakamatay dugay na niyang nakaila tungod kay iya kining listener samtang nagtrabaho kini isip katabang sa Talamban, dakbayan sa Sugbu.

Matud pa niini nga naabot si Nita sa Balamban niadtong miaging adlaw ug nagpatabang kini sa iyang programa sa pag-plugging sa pagpang-hire og mga katabang nga unom ka buok nga dalhon niini sa dakbayan sa Sugbu.

Iyang giubanan niadtong miaging adlaw sa pagpangita og mga katabang sa barangay Aliwanay ug nakakuha gyud sila og upat ka mga katabang ug laing duha ang napuno kagahapon sa buntag human usab gi-check niini ang background.

Giangkon usab niini nga didto na giilog sa nagpakamatay ang iyang cellphone human adunay mi-text ug gikuha ang numero niini ug giaway human usab kini magpaila nga iyang asawa.

“Ako siyang gitambagan nga dili magbinastos kay mga tigpaminaw kadto sa radio program ug malain na hinuon ngadto kaniya... nag pa as if man gud ni siya nga uyab nami pero sa ako nga bahin giisip nako siyang anak dili mi-uyab siya ray niisip niini,” si Montenegro nagkanayon. – BANAT NEWS