Giluba sa ig-agaw

CEBU - Usa ka 32-anyos nga lalaki ang giunay og dunggab sa iyang ig-agaw gumikan lang sa pagpalong niini sa telebisyon samtang kini nagluto ug nagtan-aw og salida niadtong Huwebes sa buntag diha sa ilang balay sa sitio Sudlong-Riverside sa barangay Lahug.

Ang biktima nga nakaangkon og samad dinunggaban sa walang bahin sa lawas giilang si Rene Navarro,32, walay trabaho ug nagpuyo sa maong dapit.

Samtang mitahan hinuon ang iyang ig-agaw'ng midunggab kaniya nga si Louie Villajos, 18, tinun-an sa kolehiyo ngadto sa mga mirespondeng sakop sa Mobile Patrol Group.

Matud pa ni SPO1 Geoffrey Gutual sa Homicide Section sa pakighinabi sa Banat News, kasamtangang nagluto ang suspek og pagkaon diha sa kusina dihang miabot ang biktima.

Giingong nagpasalida ang suspek sa telebisyon niadtong tungura ug dihang gipawong kini   ni Navarro nasuko si Villajos ug gipakgang ang nahauna.

Ning tungura nahitabo ang mainitong panaglalis sa duha ug daling nakapunit og kutsilyo si Villajos dayong dunggab niini ngadto sa iyang ig-agaw.

Ang suspek nitahan dayon sa kapolisan samtang gidala sa Cebu City Medical Center ang nasamdang si Navarro. – BANAT NEWS