2 Koreano Gipasakaan 4 Ka Kaso

CEBU - Gipasakaan na kagahapong adlawa og upat ka mga kaso ang duha ka Korean national kinsa gikatahong nanghagis sulod sa usa ka bar diha sa dalan Archbishop Reyes ingon man nanukmag og polis.

Ang duha ka mga Korean Nationals giila si Peter Lee, 43, negosyante, temporaryong nagpuyo sa may dalan Juana Osmeña ning dakbayan ug Cang Juang Lee, 36, taga RB Homes, Ibabao barangay Quiot ning dakbayan.

Kasong alarm and scandal, estafa, direct assault, ingon man drunkenness human usab ang duha positibo sa ilimnong makahubog human sa liquor test sa Cebu City Medical Center (CCMC).

Sila si PO2 Jojet Ranile sa Mobile Patrol Group (MPG) Car 012 ug mga kauban sa Mabolo Police Station maoy nakadakop sa duha sa dihang nanghagis sa usa ka bar diha sa Archbishop Reyes tungod sa kahubog ug wala mobayad sa P16 mil nga kantidad nga giinom.

Si PO2 Ranile nga gikahinabi sa Banat News nagkanayon nga nahuboy gyud ang iyang walang kilay human gisukmag ni Peter Lee sa dihang nagnilayogay silang duha diha sa CCMC human gikalitan sa pag-ilog ang iyang M-16.

Matud pa niini nga tulo ka mga higalang Koreans ni Peter ang mihangyo gyud kaniya diha sa ilang buhatan nga makig-amicable settlement labot sa maong hitabo.

Apan iyang giklaro nga iyang gibalibaran sa ingon mahatagan og leksyon ang maong mga Koreans nga mosayon-sayon lang sa mga Filipino ingon man kapolisan.

Samtang si Cebu City Police Office chief Sr. Supt. Patrocinio Comendador miawhag sa mga Korean Nationals nga mobisita dinhi sa dakbayan sa Sugbu nga magbinut-an ug mosunod sa balaod, bisan paman unsa ang nationality niini.

Hinuon ang maong insidenti gamay ra kaayo   kun hisgutan ang komunidad sa mga Koreans ug ma-kaapekto sa   mga Korean dinhi sa Sugbu.(Guam P. Logroño)

P1,000 para uniporme na-release, gikalipay

Hilabihang lipaya sa mga empleyado sa Cebu City Hall nga ma-release na ang ilang tagsa ka libong cash nga alang sa ilang dugang uniporme.

Gani nagpasalamat pa sa Banat News ang pipila niini, partikular na niadtong dayag nga nipadangat sa ilang yangungo.

Kahinumduman nga nangreklamo ang mga kawani tungod kay wala mahatag ang ilang tag-upat ka polo shirt nga ilang gibayran sa sayong bahin niining tuiga.

Apan human mapadangat ang ilang yangungo ngadto kang City Administrator Francisco Fernandez, kini nahatagan na og pagtagad.

Ang City Administrator nipagawas kagahapong adlawa og memorandum nga alang ngadto sa tanang mga department head sa City Hall nga nagmando sa paghikay na sa payroll alang sa pag-release sa tag-usa ka libo ka pesos nga clothing allowance.

Kini tungod kay giingong wala matahi ang gipaabot nga uniporme sa kapin sa 4 mil ka mga empleyado, tungod usab sa pipila ka kakulian.

Nabalaka man gud ang mga kawani nga makalimtan ang ilang gibayad tungod kay hapit na mutapos ang tuig ug laing clothing allowance na usab ang ilang madawat sunod tuig.

 “P4 mil man among clothing allowance yearly, gikuhaan nila og usa ka libo alang karong tuiga kay para kuno sa upat ka polo shirt nga wala muabot,” sumala sa usa ka kawani.

“Magpasalamat mi nga ma-release na kay makalimtan unya, hapit na ra ba matapos ang tuig, mas maayo kung ilang iapil ang interes sa among kwarta,” matud sa laing empleyado. – BANAT NEWS