Pabor si Cebu City Councilor Raul Alcoseba sa plano sa Philippine National Police (PNP) nga wagtangon na ang gun amnesty program niini.
Kini human usab muangkon ang kadagkuan sa kapulisan sa nasod nga dili epektibo ang maong programa gawas nga kini ilang gihulagway nga counter-productive.
Ang konsehal nga maoy Vice-Chairman sa Committee on Public Order and Safety sa City Council niingon nga angayang mangita na ang kapulisan og maayong programa.
Kini aron mamenusan kun dili man hingpit masumpo ang pagpalusot sa mga loose firearms nga maoy sagad gigamit sa mga kriminal ug ubang mga badlungon sa katilingban.
Ang kadagkuan sa kapulisan nisaad nga hingpit na niining ipatuman ang paggukod sa mga loose firearms human unya sa gihatag nga tagal sa gun amnesty program.
Nasayran nga ang nahisgutang programa matapos na karong sunod buwan ug gikataho nga dili na lugwayan ang pagpatuman niini.
Nagtoo ang PNP hierarchy nga ang total crackdown sa dili lisensyadong mga armas mao lang ang epektibong paagi pagsumpo sa mga loose firearms.
Base sa record sa PNP, mokabat lang og 11,700 ka individuals ug juridical entities ang nipahimulos sa gun amnesty program sukad gipatuman ang programa.
Gibana-bana sa kapulisan nga duna pay mokapin sa 115 mil ang wala marehistrong mga armas lukop nasod ug kini maoy target unya sa PNP.
Matud ni Alcoseba nga kinahanglang seryusuhon ang kampanya batok sa dili lisensyadong mga armas tungod kay kini dako og natampo sa kriminalidad sa nasod.
“Kung ilang gukdon ang mga loose firearms di mas maayo kay kargadong gamiton sa mga kriminal sa ilang kalihukan kana mang paltik nga mga armas,” sumala ni Alcoseba.
Ang PNP nipahibawo nga sa kinatibuk-an, duna lay 1,103,616 ka lisensyadong gun owners sa nasod mas ubos kay sa ilang gituuhan nga naghupot og armas.
Tungod niini nanawagan karon ang kadagkuan sa kapulisan ngadto sa mga nanag-iya og armas nga mopahimulos na sa gun amnesty program.
Kini tungod kay ang nahisgutang programa giingong kutob na lang karong Nobiyembre 14 ug wala nay himoong extension niini.
Ang high-powered handguns ug low-powered handguns nagkantidad og P3 mil matag usa samtang ang low ug high powered rifles nagkantidad og P5 mil ug depende pa usab kung tugutan sa Chief PNP ang paghatag og lisensya niini.