Operator sa Casino - Fuente buot nga huwes mo-inhibit

Ang operator sa VIP Club nga nagpadagan sa mga slot machines sa usa ka dakong hotel sa Fuente Osmeña miawhag sa presiding judge sa Regional Trial Court Branch 16 sa pag-inhibit sa iyang kaugalingon sa kasong gipasaka niini batok sa kagamhanan sa dakbayan sa Sugbo ug ni Mayor Tomas Osmeña.

Ang Waz Lian Management Philippines, Inc. ug My All Group Limited misang-at og mosyon pag-awhag kang Judge Sylva Aguirre-Paderanga sa pag-inhibit sa iyang kaugalingon sa kasong pagpadeklarar nga nulo sa closure order nga giluwatan ni Osmeña batok sa VIP Club nga nahimutang sa Rajah Park Hotel.

Kini human nakita sa maong operator nga gidalidali ang pagpa-dismiss sa kaso bisan walay gisang-at nga motion to dismiss gikan sa kagamhanan sa dakbayan sa Sugbo.

Si Aguirre-Paderanga mi-dismiss sa kaso bisan pending pa sa iyang sala ang aplikasyon para sa “status quo ante” ug ang aplikasyon para sa “preliminary mandatory injunction.” Sama sa duha ka aplikasyon, wala pa usab maresolbar ang motion for inhibition.

Sumala pa sa mosyon nga ang dismissal order ni Aguirre-Paderanga nga mipabor sa closure order ni Osmeña usa ka dakong sayop tungod kay ang interpretasyon sa korte sa balaod wala basehan.

Gisukip sa maong mosyon ang sulat ni Carlos Bautista Jr., vice president for corporate and legal services department sa Pagcor, nga nagpahibalo kang   Osmeña nga ang Casino Filipino – Fuente Osmeña Branch dili angay pasirad-an tungod kay gitugot kini sa ulohang buhatan sa Pagcor.

Ang sulat ni Bautista ngadto kang Osmeña nagkanayon nga ang Casino Filipino – Fuente Osmeña Branch gidumala ug gikontrolar sa Pagcor busa wala kini magkinahanglan og Certificate to Operate.