Tawong hubog giurom patay

CEBU - Usa ka tawo nga nakatulog gumikan sa hilabihang kahubog nadayonan sa pagkamatay ug gituohang giurom didto sa Caltex Gasoline Station sa dalan Plaridel sa barangay Alang-Alang, dakbayan sa Mandaue alas 5 pasado ang takna sa buntag kagahapon.

Ang napalgang nagbuy-od ug wala nay kinabuhi sa luyong bahin sa   nahisgutang gasolinahan mao si Paul Monterola, 34 , minyo nga taga barangay Canduman sa dakbayan sa Mandaue.

Ang unang nakadiskobre sa patay’ng lawas ni Monterola mao ang guwardiya sa gasolinahan nga si Bryan Dolorico, hingkod.

Si PO2 Arthur Cuyos sa kapolisan sa Presinto 1 sa Centro Police Station nagkanayon nga si Monterola may gikainom nga wala hiilhing tawo sa sayo pang kagabhion niadtong Martes.

Dihang nahubog na misuway na kini og sakay sa iyang motorsiklo kay mopauli na nianang pagka-alas 11:00 sa kagabhion.

Apan gumikan sa hilabihang kahubog, naglisod na kini sa pagsakay sa iyang sakyanan, busa gipakanaug na lang kini sa gikainom niyang higala ug gipahigda sa baldusa.

Dugang pa ni PO2 Cuyos nga nianang pagka-alas 5:00 sa buntag kagahapon samtang mi-roving ang guard on duty nga si Dolorico sa palibot sa gasolinahan, nakurat nalang kini dihang nakita niyang nagbuy-od si Monterola.

Apan misamot ang iyang kakurat dihang pagpukaw niya niini wala na motingog ug dihang iyang gihikap, bugnaw ug migahi na ang lawas sa biktima ug wala nay ginhawa.                                                                                                                                                                                                                                                    

Si Dolorico midali sa pagpangayo og panabang sa kapolisan sa Presinto 1 sa Centro Police Station kinsa mikompirmar nga patay na gyud si Monterola.

Gidala sa Rolling Hills sa Banilad sa dakbayan sa Mandaue ang patay’ng lawas niini aron ma- autopsy. (BANAT NEWS)