Mipatay sa polis gikasohan na

CEBU - Gikasohan na sa korte   ang drayber sa sakyanan nga maoy nakapatay sa usa ka polis didto sa Mandaue City niadtong miaging adlaw.

Si SPO2 Joel Catabas, imbestigador sa traffic division sa Mandaue City Police Office (MCPO) mitug-an sa Banat News nga ang drayber nga si Cristopher Lamela, 33, minyo nga taga Puna, San Remegio, Cebu gitanggong karon sa detention cell sa Police Station 2 sa Subangdaku, napasakaan na og kasong reckless imprudence resulting to homicide and serious physical injuries.

Ang close type delivery van nga gimaneho ni Lamela gipanag-iya sa GID Fishing Corporation nga nagdala sa plate number GXE 257. 

Nasayran gikan kang SPO2 Catabas nga gikan si Lamela sa dakbayan sa Sugbo ug nagdagan kini subay sa Ouano Avenue sa reclamation area sa dakbayan sa Mandaue niadtong miaging Domingo sa hapon dihang sa paghiabot niini sa Ouano Avenue sa maong dakbayan , nadombolan ang motorsiklo nga gisakyan ni PO2 Leonard Dinsay uban sa laing polis nga angkas niya nga si SPO2 Felizardo Callego.

Gumikan sa kakusog sa pagkadombol, nangalagpot ang duha ka polis dungan sa pagkalagpot sa ilang motorsiklong gisakyan.

Apan pagtugpa nila sa karsada, si PO2 Dinsay maoy nagrabihan kay nabundak pag-ayo ang ulo niini sa sementadong karsada nga maoy hinungdan sa iyang kamatayon samtang si SPO2 Callego anaa karon sa kritikal nga kahimtang. (BANAT NEWS)