CEBU - Mayor Socrates Fernandez padayong nanalipod sa iyang anak nga si Joavan Fernandez human sa pagkadakop sa naulahi sa mga sakop sa National Bureau of Investigation.
Apan masaligon ang mayor nga makalingkawas kini gumikan sa “teknikalidad” sa pamaagi sa kapolisan pagsang-at sa kaso batok sa iyang sinagop.
Samtang ang amahan sa usa sa giingong biktima ni Joavan nga si Oscar Abellana, amahan ni Osbert , nalipay sa pagkasikop niini.
Ang kasong two counts of serious illegal detention nga giduso sa pamilyang Abellana gisang-at ni Talisay City Prosecutor Marshall Rubia niadtong Lunes sa buntag sa sala ni Regional Trial Court (RTC) Judge Manuel Patalinghug sa Branch 22 kinsa miluwat dayon nianang pagkahapon og warrant of arrest batok kang Joavan.
Si Oscar Abellana sa pakighinabi niini sa Banat News nagkanayon nga duna siya’y kahadlok dihang nagsuroy-suroy pa ang anak sa mayor.
Gibutyag ni Oscar nga niadtong Domingo sa hapon gisultihan siya sa iyang kaubang dispatser nga gipangita siya ni Joavan niadtong Biyernes, gikatahong dunay upat ka tawong kauban si Joavan ug pulos nagbagal ang hawak.
Ang mayor nga nahinabi sa mga tigbalita diha sa buhatan sa NBI diin gidala si Joavan nanghinaot nga makapiyansa kini.
Usa sa gibasol sa mayor nga midako ang isyu sa iyang anak gumikan usab sa pipila ka mga sakop sa media ilabi na sa mga pamantalaan base sa panglantaw sa mga political analysts diha sa Talisay.
Gisalig nalang sa mayor ang dangatan sa iyang anak sa kaligdong sa korte paghusay sa maong kaso. Matud pa niya sa interview sa DyHP nga mismong ang upat ka polis nga maoy midakop sa iyang anak miluwat og affidavit ug mipreparar sa kasong “slight illegal detention.”
Apan dihang papirmahan na kini kang Supt. Romeo Perigo giusab kini sa naulahi ug gihimong “serious illegal detention” nga diin walay piyansang gitakda sa balaod ug kung makombikto mabilanggo og tibuok kinabuhi.
Gipasanginlan usab niya si Perigo nga maoy nimugna sa kasong murder ug two-counts of frustrated murder batok sa iyang anak may labot sa jeepney driver nga gipatay.
Apan si Perigo dihang gihinabi sa Banat News kusganong mihimakak nga gi-personal niya si Joavan gumikan kay ang kausabang iyang gihimo iya rang gibase sa sirkumstansyang gilatid sa Revised Penal Code.
Iya usab gihimakak nga may miimpluwensya kaniyang politico nga buot dauton ang mayor.
Si Fernandez sa iyang bahin mipasalig nga di niya gukdon si Perigo, ang pamilyang Abellana ug wala siya’y aligutgot niadtong mga tawong nasuko sa iyang anak ug isipon nalang niyang tipik ug kabahin kini sa iyang pagkamayor sa dakbayan sa Talisay.
Nipadayag usab ang mayor nga andam siyang magpasubli karung umaabot 2010 election aron iyang ipadayon ang pagserbisyo sa mga Talisaynon kana kung hatagan gihapon siya og mandatus sa katawhan.
Si Sr. Insp. Jovito Canlapan, officer in charge sa Talisay City Police Station sa pakighinabi niini sa Banat News kagahapon sa buntag nagkanayon nga wala silay nadawat nga kopya sa maong warrant of arrest.
Si Joavan kinsa nagpamasahe diha sa usa ka massage clinic sa Tabunok ang gisikop sa mga sakop sa NBI subay sa maong warrant.
Nakuha sa mga sakop sa NBI gikan sa bulsa sa karsones ni Joavan ang unom ka bala sa kalibre .45 nga pistola, usa ka magazine sa KG-9 machine pistol ug drug paraphernalia. (BANAT NEWS)