German gipusil, gitulis

CEBU - Gipusil daan una pa gitulis ang usa ka German National sa tulo ka wala mailhing tulisan sulod sa ilang pinuy-anan sa miaging gabii diha sa Gunter Compound sa sitio Quarry barangay San Roque lungsod sa Asturias.

Ang biktima nakaangkon og samad pinusilan sa walang dughan ug anaa karun sa South General Hospital sa siyudad sa Naga mao si Marks Herbert Gunter 65, naminyo sa usa ka Pilipina ug nagpuyo diha sa naasoy'ng barangay.

Si Sr. Supt. Carmelo Valmoria, Director sa Cebu Provincial Police Office mitug-an sa mga tigbalita kagahapon nga pasado alas 7 sa niaging gabii nagluto ang biktima sa usa niya ka balay sanglit duha ka panimalay ang gipanag-iya niini sulod sa compound.

Gikatahong nigawas ang biktima ug dunay giadto sa pikas balay apan sa iyang pagbalik diha na ang tulo ka armadong tulisan ug sa walay daghang estorya gipusil dayon kini tulo ka higayon.

Matud ni Valmoria tulis gyud ang motibo sa tulo ka mga tulisan tungod kay dunay nawagtang nga kuwarta nga hangtud karun wala pa matino sa kapolisan kung pila gyud ang nadala sanglit nagpadayon pa usab ang ilang imbestigasyon.

Hinuon duna nay nailhan ang mga polis nga responsable sanglit ang tulo gikatahong wala magtabon sa ilang mga nawong.

Nipasabot hinuon si Valmoria nga ang nahitabo sa mga langyaw dinhi sa lalawigan dili angayang ikaalarma ug nipadayag nga luwas pa gihapon puy-an ang Sugbu sa mga langyaw'ng turista.

Si PO3 Jose Claro Hoyohoy nga nahinabi sa Banat News kagahapon nga nag-inusara lang ang biktima niadtong higayona.

Kagahapon sa hapon ang mga polis sa maong lungsod nianhi dinhi sa provincial prosecutors office aron pormal nang ipasaka ang tukmang kaso batok sa mga responsable.

Hinuon wala pa gibutyag sa kapolisan ang mga pangan sa tulo ka mga gikatahapan.

Ang Banat News nisuway unta sa pagkuha og update diha sa South General Hospital kabahin sa kahimtang sa maong langyaw apan ang nurse on duty nga nakatubag nagdumili paghatag og impormasyon tungod kay matud pa gidili kanila ang paghatag og mga impormasyon.  (BANAT NEWS)