Tulo gipamatay niadtong Domingo

CEBU - Natuldokan ang kinabuhi sa tulo ka mga lalaki niadtong milabay'ng Domingo sa gabii sa tulo ka nagsunod nga managlahing insidente sa pagpamusil dinhi sa dakbayan sa Sugbu.

Unang gipusil mga ala 5:50 sa hapon ang usa ka Wellan Bacalla 41, diha sa may A. Lopez St., sitio Sto. Niño barangay Labangon ning dakbayan, way trabaho ug nagpuyo sa nahisgutang lugar.

Usa ka ginganlan lang og “Blas” maoy nipusil sa biktima ginamit ang ka .45 samtang naglakaw kini diha sa dapit ug gisundan sa suspetsado dayon gipusil ug daling nisibat palayo sa maong lugar.

Human maigo sa tuong bahin sa lawas gidali unta kini sa pagdala sa Cebu City Medical Center apan namatay pipila ka oras human nalandig sa maong tambalanan.

Wala pa maestablisar sa kapulisan kun unsay motibo sa maong pagpamusil samtang usa ka kabhang sa .45 ang nakit-an diha sa crime scene.

Pagka-ala 6:30 sa gabii sa samang adlaw usa ka Jerson Sormillon kargador sa Pasil Market nagpuyo sa lugar ang gipusil usab ug nakabsan sa kinabuhi diha sa CCMC human gipusil sa wala mailhing suspetsado sa dalan Gines St., sa sitio Wakwak barangay Sawang Calero.

Ang biktima gikatahong naglingkod daplin sa dalan sa nahisgutang dapit dihang kalit lang gipusil makaduhang higayon sa suspetsado tumong sa ulo niini.

Mga imbestigador sa kapulisan dakbayan sa Sugbu nagtoo nga personal o ba kaha drug related ang motibo sa maong pagpamusil.

Samtang pagka-alas 7:00 sa gabii usa na usab ka Lino Bedrijo 23, nga usa ka manindahay og sigarilyo ang gipusil diha sa dalan Logarta sa barangay San Roque ning dakbayan.

Usa ka kanhi sakop sa Lungsod Batok Salaod (Lubas) nga giilang si Servando Pajuay, 54, taga Kalubihan barangay Talamban ug kargador sa Carbon Market ang nadakpan sa kapulisan human sa pagpamusil.

Ang biktimang si Bedrijo gikatahong naglakaw sa maong dapit dihang kalit lang gipusil sa suspetsado diha sa lawas.

Sa gihimong pagsukit-sukit nila ni SPO4 Alex Dacua ug mga kaubanan sa Homicide Section sa Cebu City Police Office sa suspek miangkon kining iyang gipusil ang biktima.

Kini tungod kay gibaharan siya niining patyon dihang nagkabangi silang duha human pasanginli ang biktima nga maoy nikawat sa kariton sa suspetsado, apan ang kapuyo sa biktima nitataw nga ang suspect maoy nibahad nga patyon ang iyang biktima. (BANAT NEWS)