2 ka polis nadisgrasya tabangan - PRO 7

CEBU - Abagahon sa Police Regional Office (PRO-7) ang tanang bayranan sa hospitalization sa duha ka mga police nga sakop sa Waterfront Polis Station human makasugat og disgrasya sa may dalan Ouano, North Reclamation Mandaue City niadtong Domingo sa hapon.

Nasayran nga sila si PO2 Felisardo Callego ug PO2 Leonardo Dinsay mga sakop sa miscellaneous team sa Waterfront Police Station sa Cebu City Police Office nadasmagan sa usa ka van nga gikargahan og isda nga gimaneho ni Christoper Lamela.

Sila si PO2 Callego ug Dinsay mag-serve unta kini og warrant of arrest sa usa ka suspetsado sa pagpangawat diha sa dakbayan sa Mandaue apan gidemalas human nakasugat og aksidente sa dalan.

Si Dinsay nakabsan diha sa Chong Hua Hospital niadtong Domingo sa hapon human wala na makaagwanta sa mga samad ug kadaot sa iyang lawas sa dihang nangalabay atol sa pagkadumbol.

Si PRO-7 chief Ronald Roderos mipadayag sa mga sakop sa media nga katungdanan sa PRO-7 sa pag-abaga sa gastuhan sa ilang mga sakop sa PNP ug paghatag og financial assistance sa pamilya sa namatay ingon man sa naangol.

Ang hepe sa Cebu City Police Office Sr. Supt. Patrocinio Comendador nagkanayon nga ang kagamhanan sa dakbayan sa Sugbu kanunay   kining moabag sa kapolisan sa dakbayan sa Sugbu, samtang sila sa CCPO maningkamot usab sa pag-abag sa pamilya sa namatay ug sa naangol nga makuha ang ilang mga benepisyo.

Si Comendador mipadayag nga usa ka “great loss” sa CCPO ang pagkamatay ni Dinsay gumikan kay isip sakop sa Miscelaneous team ang maong polis mihimo gyud sa iyang gimbuhaton sa pag-duty 24 oras.

Ning pagsulat si PO2 Callego kritikal pa ug padayong gi-monitor sa mga doktor ang kahimtang niini. (BANAT NEWS)