CEBU - Laing polis nga nagmaneho sa iyang sakyanan nga hubog ug mipugos pagsulod sa no-entry zone gidakop ug gibalhog sa detention cell sa kapolisan didto sa lungsod sa Balamban apan gibuhian lang usab kini dayon human sa unom ka oras sa dihang nahuwasan na sa iyang giinom.
Ang gidakop sa kapolisan sa Balamban Police Station pinangulohan sa hepe niini nga si Sr. Insp. Resty Santos mao si SPO1 Praxilo Pamulagan Alviso, 37, minyo ug nadestino sa Toledo City Police Station.
Matud ni PO3 Celso Diaz sa Balamban Police Station sa dihang nahinabi sa Banat News subay sa blotter niining gibasehan alas 2:40 sa kaadlawon niadtong Domingo atol sa kahulogan sa kapistahan sa lungsod sakay sa sakyanan niini nga Toyota Corolla nga dunay plaka YBT- 224 si SPO1 Alviso ug paingon kining mamista sa lugar.
Paghiabot niini sa atubangang bahin sa munisipyo sa lungsod gidasmagan niini ang temporaryo nga barikada sa mga polis nga gibutang sa maong kalsada nga nagpahibalo nga temporaryong dili paagian og sakyanan ang maong dalan tungod sa gipahigayong disco sa gym niini tupad sa munisipyo.
Kini maoy hinungdan nga gipara og gipahunong nila ni Sr. Insp. Santos si SPO1 Alviso ug gikomprontasi sa iyang gihimo nga pagdasmag sa barikada nga gihimo apan misukol ug nakiglalis tungod kay nakainom usab niadtong tungora hinungdan nga gidakop kini ug gibalhog sa detention cell nianang pagka alas 2:55 sa kaadlawon.
“Gipa liquor test man to namo sa Balamban District Hospital kay nanimaho man tong bino,” dugang asoy ni PO3 Diaz.
Nahibaw-an gikan kang PO3 Diaz nga gi-release nila si SPO1 Alviso alas 9:10 sa buntag niadtong Domingo.
Sa dihang gipangutana ning tigbalita si PO3 Diaz kun pasakaan ba og kaso nila ang maong polis nagdumili kini pagtubag tungod kay ang ilang imbestigador ra ang makatubag sa maong pangutana ug sa dihang buot untang hinabion ning tigbalita ang imbestigador sa Balamban ingon man ang hepe matud pa nakalakaw na kini. (BANAT NEWS)