Koreana, pinoy gipatay sa Koreano

Usa ka Koreana ug usa ka Pilipino ang gipusil-patay sa usa usab ka Koreano kinsa nagpusil usab sa iyang ulo diha sulod sa kan-anang gipanag-iya sa Koreanong biktima sa barangay Pusok, dakbayan sa Lapulapu kagahapon sa buntag.

Patay gumikan sa mga igo sa bala ang biktimang si Kim Kil Bok, 47 tag-iya sa Blue Marine Seafoods Restaurant sa Highway Pusok dakbayan sa Lapulapu samtang patay usab ang Pilipino nga manager sa iyang restaurant nga si Joel Molo tungod gihapon sa samad pinusilan.

Gitumbok sa bana ni Kim nga si Kong Yang Bai nga ang mipusil kanila mao si Hyo Shik Woo, 60, ila gihapong paisano ug nagpuyo sa barangay Looc ug ilang partner sa negosyo sa maong restaurant.

Base sa pasiunang imbestigasyon ni SPO2 Rolito Jumao-as sa Homicide Section miabot diha si Hyo sa maong restaurant ug gikomprontase ang magtiayong Kong uban ni Molo kinsa parehong diha sa cashier’s booth niadtong tungura.

 Ang duha gikatahong naglalis mahitungod sa ilang panagsosyo sa negosyo sa maong restaurant ug sa kalit lang mibunot si Hyo sa gidala niining kalibre .45 pistola nga gibutangan og silencer ug dayong pusil sa bana ni Kim nga si Kong apan wala kini makaigo ug daling nakadagan pagawas sa maong establisamento ang babayeng Koreana.

Una pa makadagan si Kim ug Molo sila na usab ang gipaulanan og bala sa suspek hinungdan sa pagkaigo ni Molo kaduha diha sa dughan ug tuong kilid sa lawas nga nakaingon sa hinanaling kamatayon niini.

Samtang si Kim naigo usab katulo ka higayon sa iyang kilid ug usa sa dapidapi hinungdan sa kamatayon niini.

Si Hyo dihang naabtan sa kapolisan nakit-ang duna nay samad pinusilan sa ulo ug gidudahang nag-unay og pusil sa iyang kaugalingon human sa nahimong krimen.

Nakuha sa kapolisan ang ubay-ubay nga kabhang sa kalibre .45 sa maong dapit lakip na ang usa ka magazine sa .45. Gituohang duha ka magazine ang gigamit ni Hyo sa iyang pagpatay sa mga biktima.

Sa dugang imbestigasyon, si Lorna Ople (asawa ni Hyo) mipadayag sa kapolisan nga usa sa hinungdan sa kasuko sa iyang bana mao ang lakang sa magtiayong Kim nga wagtangon na kini sa ilang panag-partner sa ilang negosyo.

Matud pa ni Ople nga gipasakaan sa magtiayon og kasong Threats ug Estafa si Hyo human sa ilang panagsungi sa milabay’ng mga semana.

Base usab sa nasayran ni SPO2 Jumao-as nakakuha na si Hyo og dakong kantidad sa kita sa ilang negosyo diin gibanabana nga mokabat sa P300 mil nga wala na mahibalik sa ilang panudlanan hinungdan sa kalagot sa magtiayong Koryano.