CEBU – Hangtod karon gipaabot pa ni Regional Director Romulo Bernardez sa Land Transportation Franchising and Regulatory Board (LTFRB)-7 ang desisyon sa ilang labaw'ng buhatan sa kaulohan bahin sa pitisyon sa pagpa-rollback sa pamasahe nga gisang-at sa kanhi dakong opisyal sa maong ahensya.
Kini human ipahigayon ang pagpaminaw publiko o public hearing kalabot sa pitisyon nga gisang-at ni kanhi LTFRB-7 Regional Director Manuel Iway sa pagpa-rollback og P2 sa pasahe sa public utility jeepneys (PUJ) ug pagwagtang sa P10 nga add on sa pasahe sa taxi.
Atol sa maong public hearing giwaldas ni Iway sa atubangan sa mga operator ug mga drayber sa mga PUJ ug mga taxi ang dakong panginahanglan sa pagpa-atras sa plitehan sa PUJ og P2 ug pagwagtang usab sa P10 nga add on sa plitehan sa taxi.
Samtang giyagyag ni Iway ang mga katarungan nganong angayang i-rollback ang pasahe sa PUJ ug pagwagtang sa add on sa taxi, nagbagulbol ang mga hingtungdang operator ug mga drayber sa PUJ ug taxi.
Kini tungod kay alang kanila wala pay siguro ang presyo karon sa mga produkto sa petrolyo.
Nagtuo ang mga supakiro batok sa pitisyon ni Iway nga wala pay siguro kining pag-rollback karon sa presyo sa mga produkto sa petrolyo kay alang kanila posibleng mokalit lang usab kini pagsaka.
Busa alang kanila dili sila mosugot nga tibhangan og P2 ang kasamtangang P8 nga minimum nga pasahe sa PUJ ug P10 nga add on sa plitehan sa taxi.
Apan alang kang Bernardez nga magpaabot siya sa desisyon sa ilang central office sa Manila human niya ikaduso ngadto sa ilang central office ang pitisyon ni Iway.
Midugang siya nga kun may rollback man sa plitehan sa PUJ malagmit dili tingale P2, apan mahimong gamay pa niini, matud pa niya. – BANAT NEWS