CEBU – Nabalaka karon si Cebu City Councilor Arsenio Pacaña nga dunay mga Chinese milk products nga padayong gipamaligya dinhi sa Sugbu.
Kini bisan pa man kung gipasalig sa Bureau of Food and Drugs (BFAD-7) nga walay China-made milk ug milk-based products nga gipamaligya sa merkado sa kabisay-an.
Matud ni Pacaña nga dili malimod nga dunay mga negosyante nga mangita og paagi nga mahalin ang ilang mga baligya bisan pa man kung kini gidili na.
Usa sa posibilidad nga mahimong mapadayon ang pagbaligya sa mga Chinese milk products mao ang pag-ilis og “label” sa mga produkto.
Partikular na niini kadtong mga baligya nga gisulod og lata o plastic nga mahimong kailisan og label sa tumang kasayon.
“Posible man gyud nga gipang-ilisan lang og label nang uban, ibutang diha nga hinimo sa ubang nasud nga walay milk scare,” sumala ni Pacaña.
Subay niini giawhag sa konsehal ang BFAD-7 ingon man ang Department of Trade and Industry (DTI-7) nga mopahigayon og pakisusi sa ubang milk ug dairy products. Kini aron sa pagsuta kung wala ba ilisi ang label niini ug masigugo nga luwas ang maong mga produkto gikan sa melamine content.
Nagkanayon si Pacaña nga iyang hinabion karong adlawa si DTI-7 regional director Asteria Caberte labot sa iyang sugyot.
Ang konsehal nga maoy chairman sa Committee on Trade and Commerce sa City Council dili makatugot nga malingla ang katawhan sa mapahimuslanong mga negosyante.
Sa samang higayon giawhag usab ni Pacaña ang mga negosyante nga dili mosagol og tinonto sa ilang mga baligya nga maghatag og risgo sa panglawas sa mga konsumidor.
Sa susamang kalamboan subli usab nga gipahimangnoan sa konsehal ang katawhan ilabi na ang mga Sugbuanon nga magmatngon sa ilang pagpalit og mga milk products.
Gani una nang gisugyot ni Pacaña ang pagpalit sa mga produkto nga gikan ug gi-process dinhi sa Sugbu ug sa nasud hulip sa mga imported.
Kini samtang nagpabilin pa ang milk scare mugna usab sa mga milk products gikan sa China nga gikatahong dunay sagol nga melamine.
Duha na ka milk products ang positibo nga dunay sagol sa maong matang sa chemical ug kini mao ang Greenfood Yili Fresh Milk ug Mengniu Drink.
Ang melamine una nang gikataho nga makadaot sa panglawas sa tawo ug maoy usa sa gitumbok nga hinungdan sa kidney failure. – BANAT NEWS