CEBU – Nasikop ang duha ka mga batan-on usa niini minor de edad sa checkpoint sa mga tanod human kini makaigo sa dihang gilungkab niini ang usa ka pinuy-anan didto sa Sitio Lower Sangi, barangay Guadalupe, siyudad sa Carcar niadtong Sabado sa alas 2 sa kaadlawon.
Ang nasikop mao sila si Solomon Paradiang Magsigay, 19, ulitawo ug kauban niining 16 anyos nga si Franz pulos mga molupyo sa barangay Cabadiangan, Compostela, Cebu.
Matod ni PO1 Abraham de Jesus sa Carcar City Police Station dihang nahinabi sa Banat News subay sa blotter nga gibasihan niini ang mga suspek maoy responsable sa pagpanglungkab sa pinuy-anan sa magtiayong Allan ug Lizel Villarin sa maong lugar pipila ka gutlo sa wala pa sila masikop sa gipahigayon nga checkpoint.
Nakuha gikan sa posesyon sa mga suspek ang duha ka cellphone nga Nokia 2100 ug Sonny Ericson nga mokantidad og P6,800, MP3 player nga mokantidad og P1,300, salaping cash nga P2,000, tulo ka mga gold plated nga relo nga mokantidad ang tanan og P14,000 mga senina ug pahumot nga mokantidad og P2,000 ingon man ang lain laing souvenir nga mga kwarta gikan sa lain-laing nasud sama sa Amerika, Singapore, Malaysia, New Zealand ug Hongkong.
Subay sa inisyal nga imbistigasyon sa kapolisan giguba sa mga suspek ang jalosy nga bintana sa magtiayong Villarin sa sala niini ug dihang nakasulod na gihurot og dala ang mga nahisgutang butang.
Nakasakay na unta ang mga suspek sa usa ka mini bus nga biyahe gikan sa Barili paingon dinhi sa dakbayan sa Sugbu apan nasangit kini sa gipahigayong checkpoint sa mga tanod paghiabot sa Sangi ug didto nadiskobrehan ang mga kinawat nga butang diha sa posesyon sa mga suspek.
Ang mga suspek nagtingkagol na karon sa detention cell sa kapolisan sa Carcar ug karong buntag ipasaka ang tukmang kaso sa piskaliya batok nila. – BANAT NEWS