Tigulang natagak sa tulay

CEBU – Patay ang usa ka 55 anyos nga tigulang human kini aksidenting natagak sa taytayan nga gibanabanang 50 ka tiil ang gilawmon samtang naglakaw kini paingon nga mopauli apan didto motugpa sa batoon nga bahin sa barangay Mantalongon, Barili, Cebu niadtong Biyernes sa hapon.

Apan nakit-an ang biktima sa usa ka 16 anyos nga   si Eddie Caholes molupyo sa maong lugar niana nang pagka alas 8:00 sa gabii.

Ang biktima nga nailhan pa lang sa pangalan nga si Ponciano apelyido wala pa mahibaw-i, 55 anyos, ug molupyo sa barangay Toyokon, Aloguinsan, Cebu.

Matud ni PO3 Job Sarvida sa Barili Police Station dihang nahinabi sa Banat News subay sa blotter niining gibasehan ang 16 anyos na nga batan-on maoy mipahibalo sa mga opisyal sa barangay nga dali dayong mipahigayon og rescue operation human makit-i ang tigulang nga nagbuy-od na sa batoon nga lugar ubos nga bahin sa maong taytayan.

Gidala ang biktima sa pinuy-anan ni Caholes ug didto gipahigda samtang gitambalan ang mga dagkung pangos sa nawong ug kalawasan niini nianang tibuok gabii ug pagkabuntag na kini gihatod sa pagpauli human makamatngon og balik sa panimuot ang biktima.

Apan nahibaw-an na lang sa kapolisan nga niadtong Sabado namatay gyud ang maong tigulang ug padayon pang gi-imbistegar karon sa kapolisan ang hinungdan sa kamatayon niini ug ang pagsuta kun wala bay foul play ang pagkatagak sa maong tigulang sa maong taytayan.

Gituohan nga internal hemorrhage sa ulo ang gikamatyan sa biktima.

Matud pa gikan nga nanabo sa Mantalongon ang maong tigulang ug naglakaw kini paingon na untang mopauli sa Aloguinsan apan aksidenting natagak paghiabot sa maong lugar. – BANAT NEWS