Puya gisulod sa botelya sa softdrink

CEBU – Usa ka puya nga gituohang gipakuha sa sabakan sa iyang inahan   nakit-an kini nga gilabay ug gisulod sa usa ka botelya    sa softdrinks naglutaw-lutaw sa kadagatan didto sa barangay Dunggoan, siyudad sa Danao niadtong Sabado sa alas 11:30 sa udto.

Usa ka Saldy Batucan Gomez, 29, minyo ug nagpuyo sa Sitio Cuacohon sakop sa nahisgutang barangay   nakakita niini samtang nangaligo kini kauban sa iyang mga barkada sa maong lugar.

Matud ni PO1 Marlon Remollo sa Danao City Police Station sa dihang nahinabi sa Banat News subay sa blotter nga gibasihan niini nga samtang nagkalingaw og pangaligo ang grupo ni Gomez nakit-an niini diha sa ilang duol ang usa ka botelya sa softdrink nga naglutaw-lutaw sa ilang duol ug sa dihang ilang gipunit og gitan-aw nakit-an niini ang usa ka puya nga patay nga gisulod niini.

Dali dayon nilang gi-report sa kapolisan ang maong nakit-an nga botelya nga dunay sulod nga puya ug sa gihimong pakisusi gibana banang nagpangidarun pa og lima ka bulan ang maong bata. – BANAT NEWS