Wanted nasikop

CEBU – Nasikop sa kapulisan ang usa ka notadong “wanted “ nga tawo didto sa pinuy-anan niini sa Sitio Taob, barangay Valladolid siyudad sa Carcar niadtong Huwebes sa alas 6:00 sa sayong buntag.

Ang dugay nang gipangita sa mga otoridad mao si Erwin Mahilom Morga, 21, ulitawo ug molupyo sa nahisgutang lugar.

Si PO3 Reynaldo Fuentes sa Carcar City Police Station nga nahinabi sa Banat News nagkanayon nga ilang gidakop ang suspek human malutsi og warrant of arrest sa kasong pagsuway og patay nga pinirmahan ni Judge Oliver Peras sa Regional Trial Court (RTC) Branch 10 sa maong dakbayan.

Ang korte mirekomendar og P200 mil nga pyansa alang sa temporaryong kagawasan sa suspetsado.

Matud ni PO3 Fuentes , nga ang suspek maoy gitumbok nga responsabli sa pagpamusil sa silingan niini didto sa Sitio Taob niadtong bulan sa Hulyo ning tuiga.

Nasayran nga gisaka sa maong suspek ang biktima ug gipusil sa ulo apan maayo nalang kay wala kini ma-antimano ug nakalingkawas sa tinong kamatayon.

Dunay mga huhungihong nga ang suspek giila kini nga labing isog sa ilang lugar. – BANAT NEWS