CEBU – Kasong estafa ang gipasaka batok sa usa ka suspetsadong illegal recruiter human kini madakpi kagahapon sa kadlawon didto sa IT Park, sa barangay Apas ning dakbayan.
Si SPO4 Rioleto Jacalan, chief investigator sa Mabolo Police Station, miila sa suspetsado nga si Luisa Pido-ditan, 43, taga Paseo Juan Maria Luisa Estate Park, barangay Banilad, ning dakbayan.
Si Pido-ditan nasikop nila ni SPO1 Neri Cahimat ug PO1 Joseph Cutanda sa Mabolo Police Station human kini malutsi og warrant of arrest nga giluwatan ni Judge Ramon Codilla sa Regional Trial Court branch 19 nga may petsa nga Septembre 11, ning tuiga.
Si SPO1 Cahimat nga gikahinabi sa Banat News miila sa usa sa mga nabiktima sa suspetsado nga mao si Andrew Villacin .
Ang biktima dali kaayo nga nakatawag og polis dihang nakita niya ang suspetsado didto sa IT Park kagahapon sa kaadlawon.
Mokabat sa P60 mil nga piyansa ang girekomendar sa korte alang sa temporaryong kagawasan sa suspetsado. – BANAT NEWS