P2.6M, 63,000 yen sa Hapon gisakiyo

CEBU – Mikabat sa P2.6 milyones ug 639,000 yen nga sulod sa usa ka safety box nga gipanag-iya sa usa ka Hapon gisakiyo sa usa ka lalaki, dala ang sakyanan niini gikan sa iyang panimalay sa dalan Rubi, Casals Village, barangay Mabolo, ning dakbayan kagahapon sa alas 2:45 sa kaadlawon.

Si SPO4 Riolito Jacalan, imbestigador sa Mabolo Police Station, miila sa Hapon nga si Junyu Takahashi, 48, ug negosyante dinhi sa dakbayan sa Sugbo.

Si Takahashi giubanan sa iyang private secretary nga si Lileth Gigante sa iyang pag-report sa kapolisan.

Giila sa kapolisan ang misibat sa safety box sa Hapon nga sulod ang naasoy’ng kantidad sa salapi nga mao ang usa ka Christopher Tariman, taga Estaca, Compostela.

Sumala pa ni SPO4 Jacalan nga human makuha ni Tariman ang safety box, misakay kini sa Nissan March nga kolor itom nga iya ni Takahashi.

Atol sa follow up operation sa kapolisan sa Mabolo, nakuha og balik kagahapon sa hapon ang maong kantidad sa salapi gikan sa panimalay ni Takahashi sa Compostela.

Usa ka tawo nga wala magpaila maoy miuli sa kuwarta, apan wala na igkita si Tariman. – BANAT NEWS