Di bukog sa tawo
Di bukog sa tawo ang gikagubtang bukog nga napalgan diha sa Tejero base sa gihimong eksaminasyon ni chief medico legal sa PNP Regional Laboratory -7 Dr.Nestor Satur.
Ang mga bukog nga naalaang iya sa tawo nakit-an niadtong mga ala- una sa hapon sa milabay’ng adlaw diha sa kanhi buhatan sa Department of Public Service (DPS) sa 13th St., barangay Tejero ning dakbayan.
Si Sr. Insp. Mario Monilar ang hepe sa Homicide Section sa Cebu City Police Office dihang gikahinabi sa Banat News mibutyag nga dihang gitan-aw ni Satur ang mga bukog dili kini iya sa tawo kundili gikan kini sa usa ka hayop.
Matud pa niini nga ang maong bukog sa hayop posibleng gilabay lang sa maong lugar lakip na kadtong mga buhok sa tawo ug mga sapot gumikan kay kanhi kini buhatan sa DPS.
Nasayran nga usa ka Remegio Ruiz, 41, taga sitio Kalinao barangay Mabolo, manguykoyay og basura maoy ni-report sa kapulisan labot sa bukog nga iyang nakit-an dihang nanguha siyag mga basura.
- Latest
- Trending
