Usa sa mga biktima ni Joavan gipatrabaho sa Talisay, susihon

Mga opisyal sa dakbayan sa Talisay mosusi   kabahin sa taho nga ang usa sa giingong biktima sa anak sa mayor sa dakbayan nga si Joavan Fernandez ang gipatrabaho diha sa city hall sugod kagahapon.

Gikataho nga si Winston Abellana ang giingong gitanyagan sa mayor nga patrabahoon diha sa city hall human niini iatras ang kasong kriminal nga gipasaka niya batok kang Joavan.

Si Bise Mayor Lani Abarquez nagkanayon nga iyaha unang kumpirmahon ang maong taho apan wala matiwas ang pamahayag niini ngadto sa Banat News kagahapon tungod kay naputol ang signal sa linya niini sa cellphone.

Sa laing bahin, si Konsehal Alan Bucao sa pakighinabi niini sa Banat News kagahapon nagkanayon nga nasagmuyo siya sa nahisgutang taho apan iyaha una kining susihon.

Matud niini nga dili maayo nga kung adunay mga naagrabiyadong tawo ang panudlanan sa siyudad ang kuhaan og pundo aron lang ibayad ngadto sa mga nabiktima.

Imbes nga ang proyekto sa dakbayan alang sa kaayohan sa tanan ang angayan untang gahinan og pundo.

Si Bucao midugang nga kaniadto nahitabo na kini dihang ang anak sa usa ka drayber sa jeepney nga gipusil ug namatay ug si Joavan gihapon ang suspetsado sa krimen gipatrabaho diha sa city hall.

Ang Banat News mitawag diha sa buhatan ni Emily Cabrera, hepe sa human resource department aron makompirma ang maong taho apan si Cabrera ang wala sa iyang buhatan kagahapon tungod kay adunay importanteng gilakaw.