P900T sa NDCC wa dawata sa Interpol

Wala dawata sa Interpol ang gahin nga P900 mil nga pundo gikan sa National Disaster Coordinating Council (NDCC) alang sa nagpadayong proseso pag-ila sa mga biktima sa nalunod nga M/V Princess of the Stars.

 Kini ang giluwatang pamahayag ni Bise Mayor Michael Rama atol sa gipahigayong blessings sa mobile morgue diha sa Cebu International Port kagahapon sa buntag.

 Matud pa ni Rama nga migahin ang NDCC og P900 mil   ngadto sa Interpol-International Commission for Missing Persons alang sa dugang pundo niini sa ilang operasyon nga nagpadayon hangtod ning higayona ug gani dugang 38 ka mga bag-ong ngalan sa mga biktima sa nalunod nga barko diin ila nang gihatag ngadto sa media alang sa pagpasibya niini.

Wala modawat ang Interpol sa maong gahin gumikan kay matud pa ni Nimal Mahagamage, ang team leader sa Interpol- Incident Response Team aduna silay kaugalingong budget sa ilang matag operasyon sa pagkuha og DNA.

Ang Interpol dunay 168 ka miyembrong mga nasud lakip na niini ang Pilipinas ug gikan niining mga nasud ug uban pang sources nakatigom ang pundok og kaugalingong pundo.

Ang gitukod nga mobile morgue ang Interpol migasto og P9 milyones sa tanang gastuhanan sa pagtukod ug pagdala niini dinhi sa Sugbu.

Gumikan niini naglaraw si Rama nga hangyuon ang NDCC nga i-realign ang maong gahin sa pagtabang sa mga ginagmay nga panginahanglan ug gastuhanan sa nagpadayong operasyon diha sa CIP diin nahimutang ang mobile morgue.

Ang maong pasilidad nigamit og kuryente ug may mga magbalantay ingon man ubang kinahanglanon alang sa maintenance niini.

Sumala pa sa IRT ug NBI-DVI teams gikatakdang magsugod og pangabot ang mga patay’ng lawas gikan sa nalunod nga MV Princess of the Stars sa Romblon karon nang katapusan.

Kini human masugdi sa salvage team ang pagkuha sa kemikal nga endosulfan sugod niadtong milabay’ng semana.

 Samtang subling gipadayag ni Dr. Renato Bautista, team leader sa NBI- Disaster Victim Identification nga magpadayon ang ilang operasyon hangtod sa katapusang lawas nga maugkat sa MV Princess of the Stars ug mabalik kini ngadto sa ilang kabanay.