Mag-uuma gipatay sulod sa iyang balay

Patay diha-diha ang usa ka mag-uuma human kini pusila sa duha ka mga wala mailhing mga tawo sulod sa iyang kaugalingong panimalay sa barangay Lawaan dakbayan sa Danao sa milabayng gabii.

Ang biktima mao si Alvino Torres Matugas, 36 , (dunay ka-live-in) ug residente sa maong dapit, samtang padayon pang nag-imbestigar ang kapolisan pag-ila kung si kinsa ang maong mga mamumuno.

Base sa pasiunang imbestigasyon ni SPO4 Ramerito Ramonida sa kapolisan sa Danao ang duha ka wala mailhing suspek gikatahong mibisita diha sa panimalay sa biktima alas 11 pasado na sa buntag sa milabayng adlaw.

Matud pa ni Analiza Hermnoso (live-in partner ni Matugas) iyang nakita nga naglalis si Matugas ug ang duha niini ka bisita ug sa kalit lang usa kanila ang mibunot sa kalibre 45 dayong pusil sa iyang ka-live-in.

Patay diha-diha ang biktima gumikan sa samad pinusilan sa ulo, dagway ug abaga ug wala na madala sa tambalanan gumikan sa kalayo sa maong barangay.

Ang kapolisan sa Danao blangko pa sa pagkatawo sa mga mamumuno ug bugtong nakuha sa dapit nahitabuan mao ang tulo ka mga kabhang sa kalibre 45.

Samtang pipila ka mga residente sa maong dapit nagduda nga sakop sa walhong kalihukan ang biktima apan ang kapolisan sa Danao wala mokumpirmar kalabot sa maong impormasyon.