Block 10 sa recla nabayran na's Robinsons

Hingpit nang nahalin ang luna sa kagamhanan sa dakbayan sa Sugbu nga mao ang block 10 diha sa North Reclamation Area.

Ang pinirmahay sa Deed of Absolute Sale tali sa siyudad ug sa Robinsons Land Corporation natigayon na kagahapong adlawa.

Si Mayor Tomas Osmeña maoy mirepresentar sa kagamhanang lokal sa dakbayan ug ang presidente ug COO sa Robinsons nga si Frederick Go mao usab ang mipirma sa habig sa korporasyon.

Ang kapin sa 4.6 (46,345 metro kuwadrado) ka ektaryang luna sa dakbayan gipalit sa Robinsons ug kapin sa P579 milyones niadtong tuig 2006.

Niadtong higayona mibayad ang Robinsons og P115,862,500 isip pasiuna samtang wala pa mahan-ay ang mga dokumento alang sa hingpit nga pagpalit niini.

Apan nabaraw ang tinguha sa dakbayan pagbaligya sa maong luna human usab mokwestyon niini ang Commission on Audit (COA).

Nagduda ang COA nga mas ubos ra ang P12,500 matag metro kwadrado nga gisita nga presyo sa city government ngadto sa Robinsons.

Apan giingong wala makapruweba ang COA sa ilang pasangil hinungdan nga kini mitugot sa kagamhanan sa dakbayan pagbaligya sigon sa gihatag nga presyo niini.

Matud ni Osmeña nga ang gihimo sa COA nakapaalkanse sa siyudad ug P50 milyones nga interes unta sa halin sa dakbayan.

Apan mapasalamaton lang gihapon si Osmeña tungod kay human sa duha ka tuig, natigayon na ang pinirmahay sa Deed of Absolute Sale.

Tungod sa maong kalambuan, ang dakbayan duna nay pundo nga dul-an sa tunga sa bilyon ka pesos nga halin sa block 10.

Una nang gipadayag sa mayor nga ang maong kantidad gamiton sa siyudad alang sa pagbayad sa utang niini pag-ugmad sa South Road Properties (SRP).

Kini alang na hinuon sa sunod nga tuig tungod kay ang kagamhanan sa dakbayan giingong nakabayad na sa obligasyon niini niining tuiga.

Gipaabot nga maluag-luag na ang panudlanan sa dakbayan sa mosunod nga mga tuig tungod usab sa plano sa Filinvest pagpalit og tipik diha sa SRP.