Shabu agi sa MCIA susihon sa PCAS-7

Mohimo og kaugalingong imbestigasyon ang direktor sa Police Center for Aviation Security   (PCAS 7) sa Mactan Cebu International Airport (MCIA) ang taho nga giagi sa maong tugpahanan ang binultong shabu nga gisulod sa mga appliances.

Si PCAS Director Sr. Supt. Camilo Pangcratius Cascolan sa pakighinabi sa Banat News nagkanayon ilang susihon kun giunsa pagsulod sa maong mga ilegal nga drugas diha sa ilang mga X-ray machines ug uban pang security inspections sa mga mangabot ug mogawas nga mga bagahe.

Matud pa ni Cascolan dili maka-detect ang maong mga x-ray machines og shabu ilabi na kun giputos kini sa carbon paper ug isukip sa mga parte sa usa ka appliances.

Gumikan niini susihon ni Cascolan kung unsay kamatuoran sa maong pamahayag sa tulo ka mga gipasanginlang drug traders nga nasikop sa Criminal Investigation and Detection Group-7 sa gihimong buybust operation diha sa Ma. Luisa Village sa barangay Banilad sa dakbayan sa Sugbu.

Ang maong tulo ka dinakpan nga taga Manila miangkong diha nila gipaagi ang drugas sa MCIA pinaagi sa pagputos niini og carbon paper ug isulod ngadto sa mga telebisyon ug appliances.