Miatras sa kaso vs. Joavan

Mga biktima sa pagpanagit ug pagpangulata sa anak sa mayor sa dakbayan sa Talisay nga si Joavan Fernandez miatras sa ilang kaso ug miluwat og affidavit of desistance ug ilang giangkon nga sila maoy nangawat sa ligid ni Mayor Socrates Fernandez nga gipatapakan diha sa vulcanizing shop sa ilang iyaan nga si Mercidita Abellana.

Kagahapon pasado alas 4:00 sa hapon miduso sa ilang affidavit of desistance ang nahisgutang manag-agaw lakip usab ang iyaan nilang si Mercidita nga miduso usab og affidavit of desistance sa kasong robbery nga iyang gipasaka batok kang Joavan.

Si Talisay City prosecutor Marshall Rubia sa pakighinabi niini sa Banat News kagahapon sa hapon nagkanayon nga ang mag-agaw’ng sila si Winston ug Osbert Abellana sa ilang affidavit of desistance miangkong sila’y nangawat sa ligid sa mayor.

Ang mag-agaw’ng Abellana ang miangkon usab sa ilang affidavit of desistance nga dili tinuod ang ilang mga pasangil batok kang Joavan.

Samtang ang iyaan sa duha nga si Mercidita kinsa miduol sa Criminal Investigation and Detection Group-7 ug misumbong bahin sa pugsanong pagkuha ni Joavan sa ilang telebisyon ug DVD player mibakwi usab sa nahauna niining pasangil ug mitumbok sa iyang pag-umangkong si Osbert nga maoy nikuha niini ug mitunol niini ngadto ni Joavan.

Apan matud ni Rubia nga bisan og miduso ang pamilyang Abellana og affidavit of desistance isang-at gihapon niya ngadto sa korte ang maong kaso tungod kay na-resolve na kini sa prosecutor’s office ug ang desistance dili usa sa punto nga gipadayag sa motion for reconsideration nga giduso ni Joavan sa milabay’ng adlaw.

Kahinumduman nga niadtong Agosto 11, 2008 ang mag-agawng Abellana ang mipasangil kang Joavan nga midagit ug mikulata kanila ug ang kasong two counts of serious illegal detention, grave threat ug physical injuries batok sa anak sa mayor ang naduso diha sa prosecutor’s office.

Si Mercidita ang mipasangil usab kang Joavan nga maoy mikuha sa iyang TV ug DVD isip bayad sa ligid nga nawagtang bisan wala siya’y pagtugot niini ug miduso usab og kasong robbery batok sa anak sa mayor

Ang mga giingong kauban ni Joavan sa pagpangulata nga sila si Benedick Gabasa, Mark Perez ug laing tulo ka menor de edad maoy nagtingkagol karon sa Talisay City Jail sa barangay Maghaway.